ژن.خەبات.ژیان

تۆڕی میدیایی تەوار ماڵپەڕی یەکێتی ژنانی کوردستان

لە دەشتی شارەزوور ژنانی ئاوارە بە پارەیەكی كەم بژێوی ژیانان دابین دەكەن

میهری: هەڵەبجە
‎ژنانی ئاوارەی رۆژئاوای كوردستان لە پێدەشتەكانی شارەزووردا ناچارن بە پارەیەكی كەم كاتێكی زۆر كار بكەن، تا بژێوی ژیانیان دابین بكەن.
لە نێو كێڵگەكانی پەتاتە و تەماتە و بامیە لە سنوری سەیدسادق و پێنجوێن، رۆژانە لەگەڵ كزەبای بەیاندا تا دەمە و خۆرنشین سەدان كرێكاری ژن دەبینیت كە ئاوارەی سوریا و ڕۆژئاوای كوردستانن، سەرقاڵی كۆكردنەوەی بەروبومن بۆ خاوەن كێڵگەكان، سەختی ژیانیان و ئاوارەیی و شەڕ و بەڕێوەبردنی خێزان و نەبوونی داهات، ناچاری كردوون بە كاتێكی زۆر و پارەیەكی كەم لەبەر تیشكی گەرمی خۆر كار بكەن.
زینەت جزیری، نمونەی یەكێك لەو ژنانەیە كە لە كێڵگەكاندا پەتاتە كۆدەكاتەوە، ئەو دانیشتووی كامپی باریكەیە لە عەربەت، خاوەنی هەشت منداڵە، خۆی و چوار لە كچەكانی بە ڕۆژانەی پازدە هەزار لە كاتژمێر چواری بەیانی بۆ ١١ی نیوەڕۆ كار دەكات.
زینەت جزیری بۆ سایتی تەوار دەڵێت” ئێمە كۆمەڵێك ژنین پێكەوە كاردەكەین، هەموو خزم و دۆست و دراوسێین، بە ئۆتۆمبێل دێین و دەست بەكاركردن دەكەین و ناچارین بژێوی ژیانمان دابین بكەین، هەر چەند پارەكەمان كەمە، ساڵانی ڕابردوو خواردن و ئاو لەسەر خاوەنكار بوو بە ٢٥ هەزار، بەڵام ئەمساڵ دەڵێن دەبێت خۆتان خواردن بێنن و بە ١٥ هەزار دینار كاردەكەین”.
سەبارەت بەو كاركردنە و ناچاریان كە رازیبن بە هەرجۆرێك نرخی كار زینەت ووتی” لە هەژاریماندایە بەهەموو نرخێكی كار رازیبین، هەشت منداڵم هەیە و دەبێت دایكیشم بەخێوبكەم، بە خۆشی خۆمان نییە ناچارین كاربكەین و بژێوی ژیان دابین بكەین، سەرەرای ئەوەش ئەوەی بەو ڕەنج و سەختییە كۆیدەكەنەوە بە هۆی گرانی بازاڕەوە ناتوانین هەموو پێداویستییەكانی ژیان دابین بكەن”.
چیرۆكی زینەت نمونەیەك بوو لەو هەزاران ئاوارە و سەدان كرێكارە ژنانەی ڕۆژانە لە پێناو بەدەستهێنانی بژێوی بۆ خێزانەكانیان، بەبێ گوێدانە پلەی گەرمای هاوین و سەرمای زستان بێ ماندووبوون كاردەكەن. بەپێی ئەو زانیارییانەی كە دەستمان كەوتووە لەكاتی ئامادەكردنی ئەم راپۆرتەدا بەسەدان كرێكار بەبێ جیاوازی ڕەگەزی كە سەرجەمیان لە كەمپەكان نیشتەجێن لە ڕێگەی سەركارێكەوە بەسەر دەشتی پێنجوێن و سەیدسادق و شارەزوردا دابەش دەكرێن.

هاوشێوە

ڤیدیۆ