پەرلەمانی كوردستان لەسۆنگەی بەرز ڕاگرتن و چاندنی تۆوی خۆشەویستی و ئینتیما بۆ ئاڵا، بەبڕیاری ژمارە ٤٨ لە ٢٠٠٤/٦/١٩ بڕیاریداوە ڕۆژی ١٢/١٧ی هەموو ساڵێك بەڕۆژی ئاڵا دیاری بكات، بۆئەوەی نەوەكان و رۆڵەكانی ئەم گەلە بەرزیی ئاڵاكەیان لەبیرنەكەن و تێبكۆشن لەپێناو بەرز هێشتنەوەی، هۆكاری دانانی ئەم ڕۆژەش بۆ ئەوە دەگەڕێتەوە كە لە ١٧ی كانوونی یەكەمی ١٩٤٥ ئاڵای كوردستان لەسەر دامودەزگاكانی كۆماری مەهاباد داگیرا.
مانای چوار ڕەنگەكەی ئاڵای كوردستان
سوور: هێمای شۆڕشگێڕی و خوێنی شەهیدانی میللەتی كوردە لە پێناو مافەكانیاندا.
سپی: هێمای ئاشتیی و ئاساییشە كە میللەتی كورد بەردەوام ئاشتیخوازبووە.
سەوز: لە سروشتی كوردستانەوە هاتووە و هێمای ژیانەوەیە.
زەرد: مەبەست لەڕۆژە بیست و یەك تیشكیەكەیە كە هێمای دواڕۆژی میللەتی كوردە.
