ئەمڕۆ، لەشاری سلێمانی بەئامادەبوونی حەمەی حەمە سەعید وەزیری ڕۆشنبیری و لاوانی حكومەتی هەرێمی كوردستان، چوارەمین پیشانگای نێودەوڵەتی سلێمانی بۆ كتێب كرایەوە.

لەم پیشانگایەدا چاپخانەی تەواری یەكێتی ژنانی كوردستان بە زیاتر لە 45 ناونیشان، بەشدارە‌و پیشانگەكە 10 رۆژ بەردەوام دەبێت.

جێگری بەڕێوەبەری گشتیی پێشانگەی نێودەوڵەتیی سلێمانی دەڵێت: “رێژەی داشكاندن لە بەشێك لە كتێبەكان دەگاتە 30% بۆ 40%”.

حەمەی حەمەسەعید وەزیری رۆشنبیری و لاوان بەبۆنەی كردنەوەی چوارەمین پێشانگای نێودەوڵەتی سلێمانی بۆ كتێب لەوتارێكیدا سوپاسی ئامادەكاران و هەموو ئەو كەسانەی كرد كە هاوكارو هەماهەنگ بوون بۆ سەرخستنی بەرنامەو كاری پێشانگاكە.

خاتوو ئەوین فاروق، خاوەنی كتێبخانەی ئەوین كە بەشدارە لەم پیشەنگایەدا دەڵێت: وەكو خانمێكی خاوەنكار زۆر دڵخۆشم بەبوونی ئەم جۆرە پیشەنگایە، چونكە نزیكبونەوەیەكی زۆر روودەدات لە نێوان هاوپیشەكانماندا، تەنانەت لەگەڵ دەرەوەی كوردستانیش، ئەمە بۆ گەنجان و خوێنەران هەلێكی باشترە، چونكە داشكاندێكی زۆر كراوە.

دەربارەی نوسەری ژن هەتاچەند ژنان كتێب چاپ دەكەن خاتوو ئەوین وتی: “لەئێستادا ژنان توانویانە لە هەموو كایەكانی ژیان باڵا دەست بن، ئازایانە بچنە پێشەوە، لەئێستادا بەبیروبۆچوونی من جیاوازی نەماوە، لەنێوان ڕێژەی ژنان و پیاوان، چونكە ژنان خۆیان سەلماندووە، بەبێ ئەوەی پێویستیان بەوەبێت پیاوێك پاڵپشتیان بكات”.

ئا: تریفە حەسەن