ئەمڕۆ ٢٣ساڵ تێپەڕ دەبێ بە سەر کۆچی دوایی تێکۆشەرو بیرمەندو سیاسەت مەدارو نوسەرو ڕۆژنامە نوس وشاعیری کورد مامۆستا ئیبراهیم ئەحمەد .
مامۆستا ابراهیم ئەحمەد مێژوویەکی پڕ سەروەری هەیە لە خەباتی کوردایەتی وسیاسیو ڕۆشنبیری کوردیدا و خاوەنی چەندین ڕۆژنامەو بڵاوکراوەو شیعرو ڕۆمانە
لەڕۆژی ٢٠٠٠/٤/٨کۆچی دوایی کرد یادو یادەوەری بەرز ڕادەگرین درود بۆ ڕۆحیپاکی .
یادگار و هیوا
شیعری: مامۆستا برایم ئەحمەد
لەبەر چاوی بەد، لە ترسی بەدکار
دڵ خۆم ئەکەمە گۆڕی یادگار
بە گریانی وشک، بە ناڵەی بێدەنگ
دێنمە لەرزین تەختی کردگار
بێ، هێزی ئەژنۆم بینایی چاوم
ئارامیی گیان، جەرگم، هەناوم
یاخود بەجارێ چارەسەرم کە
یا لە نامەی ژین دەربێنە ناوم
ژیان بە لاتیی و بێ دەسەڵاتیی
هیج درۆی نەبێ، سەد مەرگە، ساتی
مرۆڤ بە دیلیی بژی خۆشە، یان
بمرێ بۆ بەرزیی خاک و وڵاتی؟
شیرین بەهارە، بەهاری شادان
بێ بەهرەن لەژین، گەل ناموردان
جەژن و بەهار و سەیران و خۆشیی
گشتی پیرۆزی گەردن ئازادان
شیرین ئەزانم کە تۆش زاماری
وەک من عەوداڵی خونچەی بەهاری
هیوای تۆ یەکە، هیوای من هەزار
من بێزار نەبم، تۆ بۆ بێزاری؟
مەژی بۆ مردن، بمرە بۆ ژیان
چۆن قازانج ئەکەی، تا نەکەی زیان؟
لە زڕەی زنجیر، دڵت نەلەرزێ
پێوەند بۆ لەشە نەوەک بۆ گیان
