ئەمرۆ شەش ژنی یەزیدی كە لەساڵی 2014 لەلایەن داعشەوە رفێنرابوون و برابوونە وڵاتی سوریا ئازادكران.
لەراگەیەنراوێكیدا كە لە هەژماری تایبەتی خۆی بڵاوی كردۆتەوە نادیە موراد باڵیۆزی نیازپاكیی نەتەوە یەكگرتووەكان دەڵێت” ئەم ژنە رزگاركراوانە كە لە ساڵی 2014 لەلایەن داعشەوە بەدیل گیران لە قۆناغی منداڵیدابوون و لە عێراقەوە براونەتە سووریا و بەیانی ( ئەمڕۆ) رۆژی شەممە رزگاركران”.
هەروەها نادیە موراد باس لەوەدەكات كە هەرشەشیان سەرەتا دەگەڕێندرێنەوە هەولێر و پاشان تەسلیمی كەس و كاریان دەكرێتەوە.
باڵوێزی نیازپاكی نەتەوەیەكگرتوەكان دەشڵێت”رزگاركردنی ژن و منداڵانی ئێزدی لە دەستی داعش، هەڵمەتێكی مرۆیی بەردەوامە و ئاشناكردنەوەی ئەو 6 ژنەش بە خێزانەكانیان لە دوای نۆ ساڵ كە بەسەر ئەو كارەساتەدا تێپەڕیوە ئومێدی ئەوەمان پێدەدات كە دەتوانین كەسانی زیاتر رزگاربكەین و بەردەوامیش دەبین لە گەڕان بەدوای ئەو ژن و منداڵانەی كە هێشتا بێسەروشوێنن، بۆ ئەو مەبەستەش داوای هاوكاریمان لە هاوبەشە نێودەوڵەتییەكانمان كردووە”.
