كێڵگەی كوردستان، هەفتە بازاڕێكە لە پارێزگای هەڵەبجە و چەندین بەروبوومی خۆماڵی لە خۆدەگرێت و كاری دەستی ژنان و شیرینی و بەرهەمەكانی هەویرەمەنی تێدا نمایشدەكرێت.
نەفیە قادر لە ئێستادا خەریكی دروستكردنی خواردن و كەلانە و نانە. هەفتانە میوانێكی تایبەتی هەیە و وەك خۆی باسی دەكات هەفتانە هاوڵاتیان بەتایبەت سەردانی ئەكەن بۆ خواردنی نان و بەرهەمەكانی.
شەهێن عەبدولڕەحمان، لە هەورامانەوە یەكێكە لە بەشداربووانی هەفتەبازارەكە و شەهێن كاری دەستی و شیرینییەكانی كە خۆی دروستیكردوون و بەشێكیشی لە ڕۆژهەڵاتی كوردستانەوە هێناوە و نمایشكردووە، دەڵێت” بۆ دووەم ساڵە بەشداری لە هەفتە بازاڕەكەدا دەكەم و لەو بەرهەمانەی كە دروستیدەكەم شیرینییەكان و كاری دەستی خۆمە”.
هاوڵاتیان لە سەرجەم شار و شارۆچكەكانی كوردستان و خوارووی عێراقەوە سەردانی هەفتە بازاڕی كێڵگەی كوردستانیان كردووە، سارا سادق، كە لە وڵاتی سویدەوە گەڕاوەتەوە بۆ باشوری كوردستان و سەردانی هەفتە بازاڕەكەی كردووە، ئەو ووتی” یەكەمجارە سەردانی هەفتە بازاڕەكە دەكەم، تازەیی بەرهەمەكان و سروشتی بوونیان وات لێدەكات بەرهەمەكان زیاتر بكڕیت و دووربین لە كاڵای دەرەكی”. لەلایەكیترەوە خاتوو تریفە عەبدول هاوڵاتییەكە و سەردانی هەفتە بازاڕی كێڵگەی كوردستانی كردووە، باس لەوە دەكات تا چەندە كاتی هەبێت سەردانی هەفتە بازاڕەكە دەكات و پێی باشە هەموو ڕۆژەكانی هەفتە بازاڕەكە كراوەبێت، دەشڵێت” بەروبوومی خۆماڵی دڵنیایی دەدات بە هاوڵاتیان و سودی لێدەبینین”.
لە هەفتە بازاڕی كێڵگەی كوردستان لە هەڵەبجە سەرجەم بەروبوومەكان خۆت بە تازەیی دەتوانیت لێی بكەیتەوە و دڵنیابیت لە دڵنیایی و جۆری بەروبوومەكە، هەفتانەش ڕۆژانی پێنج شەممە و هەینی بە ڕووی هاوڵاتیاندا كراوەیە و سەرچاوەیەكی باشە بۆ ژنانی خاوەن كاری ناوچەی هەڵەبجە و هەورامان.
میهری : هەڵەبجەپ
