دیداری: میهرەبان
لەئێستادا بەهۆی چەندین هۆكاری جیاوازەوە ڕۆژانە توندووتیژیە خێزانیەكان ڕوو لەزیاد بوونن و لەبەڕێوەبەرایەتیەكانی تووندوتیژی خێزانیەكانیەكانیش چەندین ژنی سەركەوتوو كاردەكەن بۆ رێگری كردن لەتووندووتیژی و هۆشیاركردنەوەی تاكەكانی كۆمەڵگە.
رائید (ڕاز فریا ) دەرچووی كۆلێجی تەكنیكی پرۆسە كارگێڕیەكانە لەساڵی( ٢٠٠٦-٢٠٠٧ )و دەرچووی بەشی پێگەیاندنی هێزەكانی ئاسایشە لە ساڵی( ٢٠١١-٢٠١٢ ) بەپلەی ملازمی دوو لەئێستادا بەرپرسی ڕاگەیاندنە لەبەڕێوەێوەبەرایەتی بەرەنگاربوونەوەی توندووتیژی خێزانی سلێمانی.
سەبارەت بە كاركردنی وەك ئەفسەرێك خاتوو راز ووتی” كاركردنم وەك ژنێك لەم بەڕێوەبەرایەتیە بە پیرۆز ئەزانم و لەخزمەتی ژناندام بەبێ جیاوازی، هەركەس ڕووی لێكردبم دەستی هاوكاریم بۆ درێژكردووە و بەوپەری دڵسۆزییەوە هاوكاری بووم. تا كێشەكەی جارەسەربێت ئەوەی بەمن كرابێ هەمیشە هەستم بە هیلاكی نەكردووە چونكە لەكارەكەم ئاسودەبووم”.
دەربارەی ئەو گرفت و كێشانەی وەك ژن هاتۆتە رێگەی ئەو وتی”هەموو كارێك بەبێ بەربەست نابێت، بەڵام من بەسەر بەربەستەكاندا زاڵبووم و ڕێگریەكانم تێپەراندووە وە هەوڵ ئەدەم ڕێگەیە‌ك بدۆزمەوە بۆ ڕێگریەكان و پاڵپشتی بەرێوەبەر و خێزانەكەم هۆكاری سەركەوتنم بووە لەكارەكەمدا”.
ناوبراو ئاماژەی بەوەدا كە ژنان لە ئێستادا توشی تەنگ و چەڵەمەی زۆر ئەبنەوە، بۆیە پێویستە ئاگاداربن لەهەبوونی بەڕێوەبەرایەتی توندووتیژی خێزانی. دەبێت ژنان بێئاگان نەبن لەوەی كە مافێكیان هەیە و بەڕێوەبەرایەتیەك هەیە بەناوی بەڕێوەبەرایەتی توندووتیژی و هۆشیاركردنەوەی هاوڵاتیان. پێویستە بەهەموومانەوە كار لەسەر هۆشیاری خێزان و ژنان بكەین وەك میدیاكان و لایەنی پەیوەندیدار.
رائید ڕاز فریا بەتایبەت روو دەكاتە ژنان و دەڵێت” پەیامم بۆ ژنان ئەوەیە لەبوونی هەركێشەیەك هەوڵبدەن بەگفتوگۆ چارەسەری كێشەكان بكەن تا گەورەتر نەبێت. گرنگترین شت ئاشتەوایی خێزانەكانە بۆ بەرهەمهێنانی تاكی تەندروست وكۆمەڵگەی تەندروست، لەهەموو بارێكدا ژنان دەتوانن ڕوو بكەنە بەڕێوەبەرایەتیەكەی ئێمە یان رێكخراوەكانی تایبەت بە ژنان”.
خاتوو راز خۆی بەخۆشحاڵ دەزانێ كە لەڕێگەی كارەكەیەوە چەندین سیمیناری ئەنجام داوە بەمەبەستی هۆشیاری تاك چونكە خاتوو راز خۆپاراستنی لەچارەسەركردن پێ باشترە بەهیوایە هەموو خێزانێك دوربێ لەتووندووتیژی.
