ژن خه‌بات ژیان
٣٤ ساڵ خەباتی بەردەوام
ئه‌مڕۆ ٣٤ساڵ به‌سه‌ر دامه‌زراندنی یه‌کێتی ژنانی کوردستاندا تێده‌په‌ڕێت له هه‌ناوی شۆڕشی نوێوه بۆ
خه‌بات و تێکۆشانی سه‌رده‌م له‌پێناو به‌دیهێنانی ئاماجنه‌کانی ژنان و به‌هێز کردنی تواناکانیان.
یه‌کێتی ژنانی کوردستان دابڕاو نییه له‌خه‌باتی کۆمه‌ڵانی خه‌ڵکی کوردستان و پاڵپشتی هه‌موو
بزوتنه‌وه‌یه‌کی ژنانی پێشکه‌وتنخوازه له باشور و هه‌رچوار به‌شی کوردستان و جیهان.
یه‌کێتی ژنانی کوردستان له‌دامه‌زراندنییه‌وه تا ئه‌مڕۆ، بۆ ساتێکیش نه‌وه‌ستاوه له خه‌بات و تێکۆشان
له پێناو به‌دیهێنانی یه‌کسانى و به‌رزکردنه‌وه‌ى ئاستى ژنان له‌هه‌موو بواره‌کاندا‌و به‌ئیراده‌یه‌کی
پۆڵایینەوە به‌رامبه‌ر ئه‌و کۆسپ و له‌مپه‌رانه وه‌ستاوه‌ته‌وه که هاتونه‌ته ڕێگه‌ی.
ئه‌مساڵ ئه‌م یاده له کاتێکدایه که وڵاته‌که‌مان ڕوبه‌ڕووی چه‌ندین قه‌یرانی ناوخۆیی و ده‌ره‌کی بوه‌ته‌وه،
سه‌ره‌ڕای بارودۆخی خۆرهه‌ڵاتی ناوه‌ڕاست و مه‌تڕسی جه‌نگ و نائارامی که کاریگه‌ری زۆری هه‌یه
له‌سه‌ر ناوچه‌که به‌گشیتی و بزاوتی ژنان به‌تایبه‌تی، به‌هیواین به‌زوترین کات ئه‌و قه‌یرانانه تێپه‌ڕێت و
ئارامی بۆ ناوچه‌که بگه‌ڕێته‌وه و ئاشتی له جیهاندا ده‌سته‌به‌ربێ.
جیهانی ئه‌مڕۆ جیهانی شۆڕشی زانست و ته‌کنه‌لۆجیایه و گۆڕانکارییه‌کان زۆر په‌له‌و بێوچانن، بۆیه
یه‌کێتی ژنانیش له‌م قۆناغه‌دا هه‌نگاو ده‌نێت بۆ گۆڕانکاری دروست و پێویست بۆ خۆگونجاندن له‌گه‌ڵ
ڕه‌وتی پێشکه‌وتوی سه‌رده‌م به‌سود وه‌رگرتن له‌ئه‌زمونی پێشویی و داڕشتنه‌وه‌ی به‌رنامه‌ی نوێی
سه‌رده‌میانه و گۆڕانکاری له‌پێکهاته‌و شێوازی خه‌باتدا به‌به‌شداری کردنی زۆرترین ژنانی قاڵبوی هزری
ژنان و ئه‌زمونی ژنانی وڵاتانی پێشکه‌وتوو بۆ به‌ده‌ستهێنانی ماف و ئازادییه‌کانی ژنان له کوردستاندا.
بژی خه‌باتی ژنان
یه‌کێتی ژنانی کوردستان
2023/11/4
