تریفە حسن: سلێمانی
بە دروشمی “پێكەوە” لە دەستپێكی چالاكیەكانی هەڵمەتی 16 رۆژی بەرەنگاربوونەوەی توندوتیژی لەسەر بنەمای جۆری كۆمەڵایەتی بەرامبەر بەژنان و كچان دیداری سلێمانی بۆ بەڕەنگاربوونەوەی توندوتیژی لە تەلاری هونەر بەرێودەچێت.
بە ئامادەبونی قوباد تاڵەبانی جێگری سەرۆكی حكومەتی هەرێم و خاتوو كافیە سلێمانی سكرتێری یەكێتی ژنانی كوردستان و خاتو كوێستان محەمەد وەزیری كاروباری كۆمەڵایەتی و فێنك شەفیق بەڕێوبەری گشتی بەڕێوبەرایەتی توندوتیژی دژی ژنان و ئافرەتان و ژمارەیەكی زۆر لێپرسراوی حكومی و نوێنەرانی ڕێكحراوەكانی ژنان و كۆمەڵی مەدەنی و چالاكوانانی بواری مافەكانی ژنان، یەكەم دیداری گروپی هەماهەنگی بۆ بەرنگاربوونەوەی توندوتیژی رێكخرا.
لە پرۆگرامەكانی ئەمرۆی دیدارەكەدا كورتە ڤیدیۆیەك لەسەر كار و چالاكییەكانی بەڕێوەبەرایەتی بەرەنگاربوونەوەی توندووتیژی دژی ئافرەتان ‌و خێزان ‌و سەرجەم ڕێكخراوەكان نمایشكرا. پاشان دیدارەكە تەرخان كرا بۆ گفتوگۆیەكی كراوە لەسەر دۆخی ژنان و چۆنێتی بەرەنگاربوونەوەی تووندووتیژی لە رێگەی رێكخستنی چەن پانێڵێكەوە، پانێڵی یەكەم لە ژێر ناوی گرنگی و هەماهەنگی ڕێكخراوەكان و حكومەت و بەربەستەكان و میكانیزمەكان بۆ ئایندە، پانێڵی دووەم بەناونیشانی ژن و یاسا كە گوڵان بەختیار پارێزەری یەكێتی ژنانی كوردستان بەشداری تێدا كرد و پانێڵی سێیەم تایبەت بوو بە ژن و میدیا، چوارەم پانێڵیش باسێك بوو لەسەر فەلسەفەی پەروەردە و توندووتیژی دژی ژنان.
گروپی هەماهەنگی بەرەنگاربوونەوەی توندوتیژی لەسەر بنەمای جۆری كۆمەڵایەتی لە لایەن وەزارەتی كاروباری كۆمەڵایەتی حكومەتی هەرێم و دەزگای سییدوە سەرپەرشتی دەكرێت و لە ژمارەیەك لە رێكخراوەكانی ژنان و ئافرەتان و رێكخراوەكانی كۆمەڵی مەدەنی پێكهاتووە بۆ چالاكیەكانی 16 رۆژی بەرنگاربوونەوەی توندووتیژی دژی ژنان و خێزان لە شاری سلێمانی.