میهرەبان: هەڵەبجە
‎ڕەنگین سەلام محمود دانیشتووی پارێزگای هەڵەبجەیە و یەكێكە لە ژنە ڕۆژنامەنوسەكان و چالاكوانی بواری ژینگە.
خاتوو رەنگین سەرەتای كاركردنی دەگەڕێتەوە بۆ ساڵی 2003 كە بەرنامەیەكی رادیۆیی گەنجانە هەبوو، لە ساڵی 2006 وەك یەكەم ژنە پەیامنێری تەلەفزیۆنی دەستی بەكاركردن كردووە بۆ كەناڵی كوردسات و كاری پەیامنێری كردووە لە سنوری شارەزوو، هەڵەبجە و هەورامان.
لە لێدوانێكی تایبەتدا بۆ تۆڕی میدیای تەوار ووتی” لەم دەڤەرەدا تا كچ بووم كە كاری مەیدانیم كردووە تا ساڵی ٢٠١١، لە هەمانكاتدا و لە ساڵی ٢٠٠٦ وە لە ڕادیۆی دەنگی نوێ كاردەكەم، سەرەتا وەك پێشكەشكاری بەرنامە و پاشان وەك ئامادەكار و پێشكەشكار تا ئێستاش بەردەوامم.”
ئامانجی كاركردنی رەنگین لە بواری میدیادا وەك خۆی دەڵێت:” هۆشیاركردنەوەی هاوڵاتیانە لە ماف و ئەركەكانیان و زانیاری پێدانیان لە هەر دۆخێكی نوێ كە دێتە پێشەوە. هەروەها ئامانجم دروست بوونی كۆمەڵگەیەكی هۆشیارە.”
خاتوو رەنگین سلام ‎ئەندامی سەندیكای ڕۆژنامەنوسانی كوردستانە و ‎یەكێك بووە لەو رۆژنامەنوسانەی كە ئەم ساڵ بەشداری كردووە لە بەرنامەی سەردانیكەرانی ڕێبەرایەتی نێودەوڵەتی ناسراو بە (IVLP) لە ئەمریكا و ‎بەشداری كردووە لە بەرنامەی ” بەهێزكردنی توانای ڕۆژنامەنوسانی ژن لە عیراق” لەلایەن ڕۆژنامەی (TAZ) ئەڵمانییەوە.
‎رەنگین گازندە و گلەیی خۆی هەیە لە رۆژنامەنوسان و دەڵێت:” ‎لە ئێستادا سەرەڕای بەرەوپێش چوونی تەكنەلۆجیا و هۆشیاری هاوڵاتیان، بەڵام ڕەوتی ڕۆژنامەگەری تێكچووە بە شێوەیەك پیشەكە لە دەست دەرچوە و هەموو كەسێك خۆی بە ڕۆژنامەنوس دەزانێت هیچ لە یاساكانی رۆژنامەگەریش نازانن. ناتوانن بەپێی تموح و خواستی كۆمەڵگەبن، ژمارەیەكی زۆر لە مەیدانەكە كارئەكەن دەكرێت ئەمە بەرەوپێشچون ببََت؟، بۆیە گرنگە لەلایەنی مەعریفییەوە خۆمان بەهێز بكەین تا بتوانین باشترین كار پێشكەش بكەین.”
هەروەها وتیشی: ” ئەوەی گرنگە هەر ژنێك لە هەرشوێنێك و هەرجۆرەكارێكیش ئەنجام ئەدات، بەردەوابێت لەسەری تا توانا و بەهرەكانی ئەسەلمێنێت، پاشان كۆمەڵگە بە گشتی سوودی لێوەردەگرن و دەتوانێت ببێتە نمونەیەكی باش و چاوی لێبكرێت و شوێنپێی هەڵبگیرێت.”