ژن.خەبات.ژیان

تۆڕی میدیایی تەوار ماڵپەڕی یەکێتی ژنانی کوردستان

چیمەن: لە ڕێگەی شانۆوە ئەتوانین چیمان بوێت بە كۆمەڵگەی بڵێین

هاوژین شكور : گەرمیان
كچە شانۆكاری لاو چیمەن محمد لە دایكبووی ساڵی 2003 یە و دانیشتووی قەزای كەلارە، ئەم هەمونەرمەندە هەموو قۆناغەكانی خوێندنی لە كەلار تەواو كردووە و دەرچووی پەیمانگەی هونەرەجوانەكانی كفریە بەشی شانۆ. لە ئێستادا وانەبێژە لە قوتابخانەیەكی ناحكومی.
چیمەن وەك ئاكتەر بەشداری چەندان شانۆیی كردووە وەك شانۆی ئەستێرە، نما ز ، پەری ، مامۆستا، شوشە شكینراوەكان . لە دیدارێكی تایبەتی سایتی تەواردا باسی لە ئەزموونی خۆی كرد لە بواری شانۆدا چیمەن ووتی:” شانۆ بۆ من ژیانە، لە ڕێگەی شانۆوە ئەتوانین چیمان بوێت بە كۆمەڵگەی بڵێین، لە ڕێگەی نواندنەكەمەوە هەستێكی زۆر خۆشم هەیە، كاتێك لەسەر تەختەی شانۆ ڕۆڵێكی پێدەدرێت بە شێوازێك ئەڕۆمە ناو دەورەكەمەوە وەكوو ئەوەی ئەو كەسە خۆمبم”.
لە بارەی كۆمەڵگە و ئاستی تێگەیشتنیان بۆ شانۆكاران و بەتایبەت كچانی شانۆكار چیمەن دەڵێت:” بە داخەوە شانۆ لە كۆمەڵگەی خۆمان هێشتا بە شێوازێكی باش پێشوازی لێناكرێت، بە تایبەت لە گەرمیان و كەلار، جێگەی داخە نمایشێكی شانۆیی ئەكەین كەمترین بینەری هەیە”.
لەلایەكیترەوە ئەم كچە شانۆكارە بە حەسرەتەوە ووتی:” شانۆ بۆ كچ دووجار قورسە، جارێك كۆمەڵگە قبوڵی ناكات، جارێكیش خێزان، من بۆ خۆم خێزانەكەم لەسەرەتاوە بە شێوەیەكی باش پشتگیرم نەبوون، چونكە ئێرە كەلارە، ناوچەچەكی داخراوە، بەڵام سوپاس بۆ خوا لە ئێستادا خێزانەكەی خۆم لە شانۆ تێگەیشتوون و ئەتوانم بڵێم هاوكار و بینەرمن لە كارە شانۆیەكاندا چ لە كەلار بێت چ لە دەرەوەی ئێدارەی گەرمیان بێت”.
خاتوو چیمەن لە ئێستادا سەرقاڵی كاری نوێیە و وەك خۆی ئاشكرای كرد خەریكی خۆ ئامادەكردنە بۆ كارێك كە بڕیاروایە لە 8مارس نمایش بكرێت.

هاوشێوە

ڤیدیۆ