میهرەبان: هەڵەبجە
سەرۆكایەتی زانكۆی هەڵەبجە بە هاوبەشی لقی شارەزووری یەكێتی ژنانی كوردستان، بە بۆنەی 8ی مارسەوە لە ژێر دروشمی ( 8ی مارس سمبولی یەكسانی و پێشكەوتن)ە ئەمڕۆ لە هۆڵی كتێبخانەی زانكۆی هەڵەبجە پانێڵێكی زانستیان ڕێكخست و 120 نەمامی سنوبەریان نێژا.
لە سەرەتای ئەو مەراسیمەدا بە ئامادەبوونی پارێزگار و قایمامی هەڵەبجە و سەرۆكی زانكۆ لێپرسراوی لقی شارەزووری یەكێـی ژنانی كوردستان 120 نەمامی سنەوبەریان لە دەروازەی زانكۆ ناشت وپاشان دەست بە بەرنامەكانی پانێلەكە كرا، سەرەتا پرۆفیسۆر دوكتۆر مهاباد كامل سەرۆكی زانكۆی هەڵەبجە لە وتەیەكدا ڕۆڵی ژنانی بەرز نرخاند لە بەرەوپێشبردنی كۆمەڵگە ، هەروەها داوای لە ژنانی هەڵەبجە كرد كە ڕەچە شكێن بن و لە ئاست توانای كۆمەڵگەدابن.
دواتر خاتوو شارا عبدالكریم لێپرسراوی لقی شارەزووری یەكێتی ژنانی كوردستان وتەیەكی پێشكەش كردوو وێرای پیرۆزبایی 8ی مارس ووتی:” ئەمرۆ ڕۆژی یەك دەنگی خەڵكی كوردستانە و پێویستی بە خەباتی ژنان و یەك دەنگی هەیە و لەوە دەرچووە، كە تەنها ڕێكخراوەكان ڕۆڵیان هەبێت لە بەرگری كردن لە ژنان بۆیە دووپاتی دەكەینەوە كە وەك ڕێكخراوی یەكێتی ژنان و بەشێك لە كۆمەڵگە هەموو پاڵپشتیەكان دووبارە دەكەینەوە تاوەكوو ژنان لە كۆمەڵگادا بەشێوەیەكی ئازادانە كار بكەن و بەرە و ئامانج هەنگا و هەڵبهێنن.
پاشان بەشێكی سەرەكی مەراسیمەكە تەرخان كرا بۆ رێكخستنی پانێڵێك و سەرەتا دوكتۆر منیرە ئەبوبكر و باسێكی دەربارەی بەمێینە كردنی هەژاری پێشكەش كرد و دوكتۆر شوانە نوری عەبدالڵە باسی لە پێگەی ژن كرد لە شیعری كوردیدا و واتر دوكتۆر هەتاو حەمەساڵح حسێن باسێكی لەسەر فەلسەفەی ئازادی و مافەكانی ژنان پێشكەش كرد.
لە كۆتایی مەراسیمەكەشدا لەلایەن لقی شارەزووری یەكێتی ژنانەوە خەڵات بەخشرایە كۆمەڵێك ژنی ئازا و لێهاتوو كە توانیویانە بوێرانە بەرگری لە خاك و نیشتمان و ژنان بكەن .
