هونەرمەندی دێرینی میسری خاتوو لەیلا تاهیر لەوەڵامی ئەو هەواڵەی كە بڕیاریداوە واز لەنواندن‌و هونەر بێنێت دەڵێت: لەڕاستیدا وازهێنان نییە، بەڵام ئەوە ژیانە‌و كۆتایی ڕێگەكەیە، هەریەكێك لەئێمە رێگەكەی كۆتایی دێت‌و دەبێت ئاڵاكە پێشكەشی ئەوانەی دوای خۆی بكات.

لەیلا تاهیر كە ئەمساڵ لەئاهەنگی كۆتایی فێستیڤاڵی سەندیكای پیشەگەرییەكانی شانۆدا خەڵاتی رێزلێنانی پێبەخشرا، خۆشحاڵی خۆی بۆ ئەو خەڵاتە دەربڕی‌و وتی: “لەگەڵ ئەوەی لەژیانی هونەریمدا زۆر خەڵات كراوم، بەڵام ئەم خەڵاتە جێگەیەكی تایبەتی لەدڵمدا هەیە”.

پێشتر لەیلا تاهیر لەلێدوانێكی رۆژنامەوانیدا ئەوەی راگەیاند بوو كە “من پێش چەند ساڵێك وازم لەهونەر هێناوە‌و كەسیش هەستی پێنەكردووم، هەروەك كارێكی واش نەهاتۆتە بەردەمم كە مێژووی هونەریم دەوڵەمەند بكات”.

وتیشی: “بەخۆمم وت ئەمە كۆتاییمە، من كۆمەڵێك كاری باشم پێشكەشی خەڵك كردووە كە شەرەفمەندم پێی، ئیتر ئەوە بەسە، من چەند ساڵێكە دووركەوتومەتەوە ناشزانم كێ‌ بەرپرسە لەوەی من بیرچوومەتەوە، دوو ساڵ لەمەوپێش چەند كارێكیان پێشكەشكردم بۆ ئەوەی نواندنی تیا بكەم، بەڵام بۆ كەسایەتی من نەدەگونجا‌و كارەكان شیاو نەبوون، لەماوەی ئەم دوو ساڵەی رابردووشدا، هیچ كەسێك پێی نەوتوم بۆ رۆڵ بینبن تەنانەت لەدیمەنێكیشدا”.

لەبارەی گەڕانەوەی لەو بڕیاری وازهێنانەی، لەیلا وتی: “نازانم ئەتوانم پاشگەزبمەوە یان نا، چونكە ئەگەر هونەرمەند بۆ چەند ساڵێك لەهونەرەكەی دوركەوتەوە، ئەوا گەڕانەوەی قورسە‌و پێویستی بەكاتێكی زۆرە بۆ بیركردنەوە، بەڵام ئەگەر كارێكیان بۆ پێشنیار كردم‌و سەرنجی راكێشام، پێدەچێت بەبڕیارەكەمدا بچمەوە”.

لەیلا تاهیر

ناوی تەواوەتی (شیرویت مستەفا ئیبراهیم)ە

ساڵی 1942 لەمیسر لەدایكبووە‌و خاوەنی بڕوانامەی بەكالۆریۆسە لەخزمەتی كۆمەڵایەتیدا

شەش جار شووی كردووە‌و خاوەنی كوڕێكە بەناوی ئەحمەد

ساڵی 1958 بەشداری یەكەم فیلمی كردووە

ساڵی 1960 لەتەلەفیزیۆن پێشكەشكاری بەرنامە بووە

بەشداری لەدەیان فیلم‌و دراما‌و شانۆگەریدا كردووە

ئا: دڵی