بەپێی ئەنجامی كۆتایی یەكەمین هەڵبژاردنی یاسادانان لەوڵاتی قەتەر بۆ ئەندامێتی ئەنجوومەنی شورا، هیچ ژنێك براوە نەبووە. لەو هەڵبژاردنەدا كە 28 ژن خۆیان كاندید كردبوو، كەسیان نەیانتوانی سەركەوتوو بن‌و ببنە ئەندامی ئەو ئەنجوومەنە.

لیژنەی سەرپەرشتیاری هەڵبژاردنەكە ناوی 30 ئەندامی راگەیاند كە براوە بوون لەهەڵبژاردنەكەدا‌و بوونەتە ئەندامی ئەنجوومەنی شورای ئەو وڵاتە كە دەسەڵاتەكانیان سنوردارە.

ئەنجومەنی شورای قەتەر لە 45 ئەندام پێكدێت، ئەمساڵ بۆ یەكەمجارە قەتەرییەكان دوو لەسەر سێی ئەندامانی ئەنجوومەنی شورا بەهەڵبژاردن دیاری دەكەن، ساڵانی پێشتر لەلایەن ئەمیری وڵاتەوە ئەو ئەندامانە دادەمەزران، بۆ ئەمساڵیش 15 ئەندام بەدامەزراندن دەبنە ئەندامی ئەنجوومەنەكە.

تائێستا ناوی ئەو 15 ئەندامەی لەلایەن شێخ تەمیم بن حەمەد ئەمیری وڵاتەكەوە دادەمەزرێت، لەگەڵا یەكەم دانیشتن‌و كۆبونەوەی ئەنجوومەنەكە رانەگەیەندراوە‌و دیار نییە. پێشبینی ئەوە ناكرێت كە دوای ئەم هەڵبژاردنە دەسەڵاتەكانی ئەنجوومەنەكە دابەش بێت‌و گۆڕانكاری بەسەردا بێت، كە بریتییە لەدەسەڵاتەكانی یاسادانان‌و تەسدیق كردنی سیاسەتی گشتی وڵات‌و بودجە.

هەروەك ئەم ئەنجوومەنە دەسەڵاتی سیاسەتی بەرگری‌و ئەمنی‌و ئابوری‌و وەربەرهێنانی لەوڵاتدا نییە. ئەنجوومەنی شواری قەتەر ساڵی 1972 درووست بووە‌و لە نیسانی 2003 دا قەتەرییەكان دەنگیاندا بەیەكەم دەستووری وڵاتەكەیان.