تا دێت بازنەی پشتیوانییەکان لەهاوپەیمانێتی کوردستان بەرفراوانتر دەبێت، بۆ ئەو مەبەستەش دوانیوەڕۆی ئەمڕۆ چوارشەممە ٦ی ١٠ی ٢٠٢١ خاتوو شاناز ئیبراهیم ئەحمەد کارگێڕی مەکتەبی سیاسی و سەرپەرشتیاری مەڵبەندی ١ی رێکخستنی سلێمانی (ی.ن.ک) لەگەڵ ژمارەیەک لەکچان و ژنانی رێکخستنەکانی یەکێتیدا کۆبۆوە.
لەو کۆبوونەوەیەدا کە خاتوو کافیە سلێمان سکرتێری یەکێتی ژنانی کوردستان ئامادەی بوو، سەرپەرشتیاری مەڵبەندی رێکخستنی سلێمانی رایگەیاند: هەر لەڕوانگەی بۆچوونەکانی مامی گەورەوە، مامی پشتیوانی ژنان و بەدەستهێنانی مافەکانمان، ئێمە دەبێ پشت و پەنای یەکتربین، وتیشی: زۆرکەس باسیان لەوە دەکرد ئەوەتەی من هاتوم لەگەڵ ژنان کۆنەبوومەتەوە، من دەڵێم ژنان خۆیان بڕیاردەرن، بۆیە دەبێ کۆتاجار لەگەڵ ژنان کۆببمەوە.
خاتوو شاناز ئیبراهیم ئەحمەد وتیشی: من دڵنیام بەپشتیوانی ئێوە و هەمووان بەیەکەوە دەتوانین ئەم هەڵبژاردنە، ئەم ئەرکە گرنگە بەجێ بگەیەنین و زۆرترین کاندیدی هاوپەیمانی سەربخەین بۆ ئەنجومەنی نوێنەرانی عێراق.
خاتوو شاناز ئیبراهیم ئەحمەد بەژنان و کچانی سلێمانی وت: هەروەک دروشمەکەمان ئەمجارە کە بەیەکەوە بەهێزترین، دەڵێین ئێمەی ژنانیش بەیەکەوە بەهێزترین پاڵپشت و پشت و پەنای یەکترین، با پێکەوە کاربکەین بۆ سەرخستنی هاوپەیمانی کوردستان.
