97 ژنە كاندید توانیان بگەنە پەرلەمانی نوێی عێراق و لەم هەڵبژاردنەدا 14 كورسیی ژنان زیاتر بووە.

د.یوسرا كەریم موحسین، بەڕێوەبەری فەرمانگەی پەرەپێدانی تواناكانی ژنان سەربە ئەمینداریەتی گشتیی ئەنجومەنی وەزیرانی عێراق لەبەیاننامەیەكدا رایگەیاند: “سەركەوتنی ئەو ژنانە لەهەڵبژاردنی پێشوەختەی ئەنجومەنی نوێنەرانی عیراق، هەنگاوێكی پێویستە بۆ بەشداریكرنی ژنان لەسیاسەتدا، ئەمە جگە لەوەی ئەو ژنە سەركەوتووانە نوێنەرانی دەنگی ژنانی عیراقن‌و گوزارشت لەسەركەوتن‌و تموحەكانیان ئەكەن”.

دەشڵێت: “سەركەوتنی ئەو ژنانە بۆ پارلەمانی نوێ‌، ئەنجامێكی سروشتی تواناكانی ژنان خۆیانە كە بەبوێری‌و سوربوون لەسەر بەشداریكردن بەدەستیانهێناوە، ئەم ئەزمونەشیان سەركەوتن‌و شانازییەكە بۆ هەمووان”.

هەر لەبەیاننامەكەدا هاتووە: “بەپێی ئەنجامە بەراییەكان تا ئێستا لەو 97 پەرلەمانتارە، 57 یان بە دەنگی خۆیان و بەبێ پێویستییان بەكۆتا بوونەتە پەرلەمانتار و دوان لەو پەرلەمانتارانەش سەربە كەمینەكانن”.

ئەوەش لەكاتێكدایە كە كۆتای ژن 83 كورسیی بۆ دیاریكراوە و لەم هەڵبژاردنە بۆ 97 كورسی زیادی كردووە.

بەیاننامەكە ئاماژەی بەوەشداوە كە: “پەیامی راستەقینە بۆ ژنان لەچونیان بۆ پارلەمان ناوەستێ‌، بەڵكو هاندەرێكە بۆ هەموو ژنان كە هەوڵبدەن بەشداری هەموو قۆناغەكانی پرۆسەی سیاسی‌و دروستكردنی بڕیار بكەن‌و گرنگی بەپرسەكانی ژنان‌و ئەو یاسایانە بدەن كە مافەكانیان لەناو كۆمەڵدا دەپارێزێت”.

دڵی