یه‌کێتى کچه یاریزانه پیشه‌گه‌رییه‌کانى تێنسى سه‌رزه‌وى رایگه‌یاند که ئونس جابر کچه یاریزانى تێنسى سه‌رزه‌وى وڵاتى تونس، ده‌بێته یه‌که‌م کچه یاریزانى عه‌ره‌ب که ناوى بچێته ده یه‌که‌مه‌کانى جیهانه‌وه له‌و یارییه‌دا.
دواى ئه‌وه‌ى له‌قۆناغى پێش کۆتایى پاڵه‌وانێتى ئه‌ندیان وێڵز بۆ تێنسى سه‌رزه‌وى له یاریزانێکى وڵاتى ئه‌ستوانیا ده‌باته‌وه، ئونس جابرى ته‌مه‌ن 27 ساڵ‌و کچه پاڵه‌وانى تێنسى سه‌ر زه‌وى وڵاتى تونس ناوى ده‌چێته ده یه‌که‌مه‌کانى جیهانه‌وه له‌و یارییه‌دا.
دواى ئه‌و یارییه ئونس له‌لێدوانێکى رۆژنامه‌وانیدا وتى: «هه‌ستێکى خۆشم هه‌یه، کۆششێکى زۆرم کرد تا ئه‌و ئه‌نجامه‌م به‌ده‌ستهێنا».
وتیشى: «ده یه‌که‌مه‌که‌ى جیهان له‌یارى تێنسى سه‌رزه‌وى زۆر به‌من ده‌به‌خشێ، به‌ڵام من ناوه‌ستم‌و بۆ زیاتر هه‌وڵده‌ده‌م».
