یه‌کێتى تۆپى پێى نێوده‌وڵه‌تى (فیفا) ژماره‌یه‌ک کچه یاریزانى باسکه‌‌و تۆپى پێى ئه‌فغانستان‌و که‌سوکاره‌کانیان ده‌گه‌یه‌نێته وڵاتى قه‌ته‌ر.
فیفا له‌به‌یاننامه‌یه‌کدا جه‌خت له‌وه ده‌کاته‌وه که هاوکار بووه بۆ گواستنه‌وه‌ى 157 کچه یاریزانى باسکه‌‌و تۆپى پێى ئه‌فغانستان له‌گه‌ڵ که‌سوکاره‌کانیان بۆ وڵاتى قه‌ته‌ر که وه‌ک په‌نابه‌ر دڵده‌یان بدات.
به‌یاننامه‌که‌ى فیفا باس له‌وه‌ش ده‌کات که له‌گه‌ڵ حکومه‌تى قه‌ته‌ر قسه‌یان کردووه بۆ چاره‌سه‌ر کردنى ئه‌و که‌یسه، هه‌روه‌ک جه‌ختیش له‌وه ده‌کاته‌وه که وڵاتى ئه‌لبانیاش ئاماده‌یى هاوکارى خۆى له‌و که‌یسه‌دا ده‌ربڕیوه.
دواى ئه‌وه‌ى بزوتنه‌وه‌ى تاڵیبان ده‌ستى به‌سه‌ر ئه‌فغانستاندا گرته‌وه، زۆرێک له کچه یاریزانه‌کانى تۆپى پێ خۆیان حه‌شاردا‌و کۆمه‌ڵێک له یاریزانه لاوه‌کان توانیان خۆیان بگه‌یه‌ننه پاکستان.
جیانى ئینفانتینۆ سه‌رۆکى فیفا سوپاسى وڵاتانى قه‌ته‌ر‌و ئه‌لبانیاى کرد بۆ هه‌ڵوێسته‌که‌یان‌و داواى له‌حکومه‌تى وڵاتانى تر کرد هاوکار بن بۆ پێدانى ڤیزا‌و ئیقامه بۆ ئه‌و ئه‌فغانیانه‌ى روویان تێده‌که‌ن‌و ئه‌یانه‌وێت ژیانێکى نوێ‌‌و ئارام ده‌ستپێبکه‌نه‌وه.
