د. ئارام محمد قادر، وەزیری خوێندنی باڵا و توێژینەوەی زانستی، سەرپەرشتی كۆبوونەوەیەكی نائاسایی ئەنجومەنی وەزارەتی بەشێوەی ئۆنلاین بۆ چارەسەركردنی پرسی دەرچووانی كۆنمرە بەرزەكان، كرد.
دوای گفتوگۆی ئەندامانی ئەنجومەن، بڕیاردرا ئەو دەرچووانەی كۆنمرەیان 99 بەسەرەوەیە و لە كۆلێژی پزیشكی گشتی وەرنەگیراون، دوای زیادكردنی ژمارەیەك كورسی بەخۆڕایی لە كۆلێژەكانی پزیشكی گشتیی هەولێر، سلێمانی، كۆیە و گەرمیان، وەربگیرێن.
ئەو كورسیە بەتاڵانەی لە ئەنجامی سەرخستنی ئەو دەرچووانە لە كۆلێژەكانی پزیشكی ددان و دەرمانسازی دەمێنێتەوە، ئەو خوێندكارانەی دیكە سەردەكەون كە لەو دوو كۆلێژە داوایان كردەوە و وەرنەگیراون، ئەویش بەپێی كۆنمرە و ڕیزبەندی داواكارییەكانیان.
چارەسەركردنی كێشەی ئەو دەرچووانە لە چوارچێوەی پرۆسەیەكی ورد و دادپەروەرانە، لەنێوان خوێندكاران بەپێی ڕیزبەندی نمرەكان، لەلایەن ناوەندی وەرگرتن لە وەزارەت جێبەجێ دەكرێت، دوای تەواوبوونی پرۆسەكەش؛ ئەنجامەكەی بۆ خوێندكاران بڵاودەكرێنەوە.
