بافڵ تاڵەبانی، هاوسەرۆکی یەکێتی نیشتیمانی کوردستان بەبۆنەی 32ھەمین ساڵەی دامەزراندنی یەكێتیی ژنانی كوردستان پەیامێکی ئاڕاستەی سكرتێر و ئەندامانی رێکخراوەکە کرد و رایگەیاند، “پارێزەری بەدیھێنانی مافەکانی ژنان دەبین و خەبات دەکەین لەپێناو جێبەجێکردنی خواستەکانتان و یەکسانی جێندەری و روبەڕوبونەوەی پێشێلکارانی مافەکانی ژنان”.
بافڵ تاڵەبانی لە پەیامێکدا کە ئاڕاستەی سكرتێر و ئەندامانی یەكێتیی ژنانی كوردستانی کردوە ئاماژەی بەوەشکردوە، “بە بۆنەی 32ھەمین ساڵەی دامەزراندنی رێکخراوە تێکۆشەرەکەتان گەرمترین پیرۆزبایتان لێدەکەم، ھیوادارم ئەم یادە ببێتە مایەی یەکخستنی ھەوڵەکان بۆ بەدیھێنانی مافەکانی ژنان و گۆڕانکاری لەخەباتی پیشەیی ژناندا”.
ئاماژە بەوەشکردوە، “یەکێتیی ژنانی کوردستان وەک رێکخراوێکی شۆڕشگێڕ، تێکۆشەر و کاریگەری نێو خەباتی ژنان خاوەن مێژویەکی پڕ شانازی و دەستکەوتە، کە ئەمە دەبێت ھانتان بدات لەسەر خەرمانی ئەو شانازییە بەردەوام بن و سورتربن بۆ پێشڕەوایەتیکردن و سەرخستنی داوا و داخوازییەکانی ژنان و ھەماھەنگ بن بۆ دەرکردن و پارێزگاریکردن لەو پرۆژە یاسایانەی پارێزەری مافەکانی ژنان دەبن، ھاوشانی گۆڕانکارییە ریشەییەکانی یەکێتی ئێوەش بەگڕوتینێکی ترەوە خۆتان رێکبخەنەوە و پێشەنگی کاروانەکە بن”.
هاوسەرۆکی یەکێتی ئەوەشی خستوەتەڕو، “لەم یادەدا دوپاتیشی دەکەینەوە کە درێژەپێدەری رێبازی مام دەبین و بە ھەمان بیروباوەڕەوە پارێزەری بەدیھێنانی مافەکانی ژنان بین و خەبات بکەین لەپێناو جێبەجێکردنی خواستەکانتان و یەکسانی جێندەری و روبەڕوبونەوەی پێشێلکارانی مافەکانی ژنان، بەھەمو توانایەکیشمەوە رێگردەبم لەپەنابردن بۆ توندوتیژی و بەزاندنی سنوری ئازادییەکانتان”.
