ئەمڕۆ لیژنەی باڵای ڕووبەڕووبونەوەی ڤایرۆسی كۆڕۆنا، بە سەرپەرشتی ڕێبەر ئەحمەد وەزیری ناوخۆی حكومەتی هەرێمی كوردستان كۆبووەوە، لە دوای پێشكەش كردنی ڕاپۆرتی وەزارەتی تەندروستی، چەند بڕیارێك دران كە بریتین لەمانەی خوارەوە:
یەكەم: درێژكردنەوەی ماوەی وەرگرتنی ڤاكسین لەلایەن گشت فەرمانبەرانی حكومەت، بە هەردوو ڕاژەی شارستانی و سەربازی، تاوەكو ٢٠ی كانوونی دووەمی ٢٠٢٢، هەر فەرمانبەرێكیش پابەند نەبێت ئەوا بەپێی یاسای تەندروستی گشتی و بەرزەفتی فەرمانبەران مامەڵەیان لەگەڵ دا دەكرێت.
دووەم: ئەنجامدانی پشكنینی كۆڕۆنا لە خاڵە سنورییەكان بۆ هەموو ئەو گەشتیارانەی كە سەردانی هەرێمی كوردستان دەكەن، تەنانەت ئەوانەش كە كارتی ڤاكسینیشیان هەیە، جگە لەوانەی كە تێستی كۆڕۆنای پێش (٤٨) كاتژمێریان پێ بێت.
سێیەم: لیژنەی باڵا بڕیاری دا كە وەزارەتی ئەوقاف و كاروباری ئایینی بە هەماهەنگی لەگەڵ یەكە كارگێڕییەكان لە ڕۆژانی داهاتوودا ڕێنمایی تایبەت لەسەر پرسەدانان دەربكات.
چوارەم: گروپی گەشتیاری دەبێت پێش (٤۸) كاتژمێر لە گەشتەكەیان تێستی كۆڕۆنایان كردبێت یان كارتی ڤاكسینیان هەبێت.
پێنجەم: پێویستە گشت هاوڵاتیان (ئەوانەی ڤاكسینیان وەرگرتووە یان وەرنەگرتووە) لەهەموو شوێنە گشتییە داخراوەكانی وەك (فەرمانگە حكومییەكان، ماركێت، ڕێستۆرانت، شوێنە بازرگانییەكان، كۆمپانیاكان و شوینەكانی دیكەی كەرتی تایبەت) پابەندبن بە بەستنی ماسك و مەودای یەك مەتر ونیو نێوانیان بپارێزن.
شەشەم: لە دوای ۲۰۲۲/۲/۱ هیچ كەسێك ڕێگەی پێ نادرێت سەردانی شوێنە گشتییەكان بكات وەك (فەرمانگە حكومییەكان، ماركێت، ڕێستۆرانت، شوێنە بازرگانییەكان، كۆمپانیاكان و هۆڵی بۆنەكان) بەبێ هەبوونی كارتی ڤاكسین یان ئەنجامدانی تێستی كۆڕۆنا كە (٤٨) كاتژمێری بەسەردا تێپەڕنەبووبێت.
