دوابەدوای پێشكەشكردنی سیمینارێك لەسەر كارەكانی لەمیانەی بانگهێشتكردنی و سەردانیكردنی زانكۆی UCL ی بەڕیتانی-برانچ (لق)ی وەك توێژەری پێشكەوتووی سەردانكەر، د.ڕۆژین كەمال مامۆستای زانكۆی پۆلیتەكنیكی سلێمانی و بەڕێوەبەری سەنتەری توێژینەوەی كەلەپووری كولتووری دیجیتاڵی لەلایەن سەرۆك بەشی ئەوكاتەی پڕۆگرامی مۆزەخانە لە زانكۆی میواندارەوە (پرۆفیسۆر ئەلێكساندرا بۆنیا) بانگهێشتكرا بۆ نووسینی چاپتەرێك لە كتێبێكی دا. لەم مانگەدا (كانوونی دوومی ٢٠٢٢) كتێبەكە لەژێر ناونیشانی (Emerging Technologies and Museums: Mediating Difficult Heritage) بڵاودەبێتەوە كە دانانی (ئیدیت) بۆ كراوە لەلایەن پرۆفیسۆر ئەلێكساندرا بۆنیا كە ئێستا لە زانكۆی ئیجەیە لە یۆنان و د.تیۆپیستی ستایلایونو-لامبێرت لە زانكۆی تەكنەلۆجی قوبرس و د.ئەنتیگۆن هێراكلایدۆ توێژەری پۆست دكتۆرا لە تاقیگەی مۆزەخانەی سەر بە سەنتەری توێژینەوەی Interactive Media, Smart Systems and Emerging Technologies لە قوبرس و كتێبەكە لەلایەن دەزگای بێرگهانەوە بڵاودەكرێتەوە كە بنكەكانی لە شارەكانی نیویۆرك لە ئەمریكا و ئۆكسفۆردە لە بەڕیتانیا. لە چاپتەرێكی كتێبەكەدا، د.ڕۆژین كەمال باس لە ڕۆڵی تەكنەلۆجیای داهێنەرانەی واقعی مەجازی و واقعی معزز دەكات لە دەوڵەمەندكردنی ئەزموونكردنی مۆزەخانە و بینا و شوێنی كەلەپوور كولتووری. لە بەشی دووەمی چاپتەرەكەدا، لە ڕێگەی شیكاركردنی دیزاینی پێشانگای واقعی مەجازی “كەس گوێ ناگرێت”ەوە، مامۆستاكەی زانكۆی پۆلیتەكنیكی سلێمانی خوێنەران ئاشنا دەكات بە بەكارهێنانی ئەو تەكنەلۆجیا داهێنەرانە لە ئەزموونكردنی كەلەپووری كولتووری پەیوەست بە ڕووداوی سەختی وەكو جینۆسایدكردنی ئێزیدییەكان. شایەنی باسە بەڕێوەبەرەكەی سەنتەری دی سی ئێچ لەسەر ئاستی نێودەوڵەتی چەند ڕۆڵێكی كاریگەری هەیە لە نێوانیاندا، هاوبەڕێوەبەری پڕۆژە توێژینەوەیەكی گەورەی هاوبەش بەناوی تۆڕی نەهرەین (كە پڕۆژەیەكی هاوبەشی نێوان زانكۆكانی یوسی ئێڵ و ئۆكسفۆردی بەڕیتانی و زانكۆی پۆلیتەكنیكی سلێمانی و ڕێكخراوی كەلەپووری كولتووری و زانكۆی قادسیەیە) و توێژەری فەخری لە زانكۆی یوسی ئێڵی بەڕیتانی و جێگری نوێی سەرۆكی ڕێكخراوی ڕەشیدی نێودەوڵەتی لە ئەڵمانیا و هەڵسەنگێنەری نێودەوڵەتی دەزگای توێژینەوە و داهێنانی بەریتانی.