ژن.خەبات.ژیان

تۆڕی میدیایی تەوار ماڵپەڕی یەکێتی ژنانی کوردستان

هەوڵی چارەسەر كردنی كێشەی ژنە كرێكارە بیانییەكانی پشدەر دەدرێت

دوای ئەوەی ئێوارەی ئەمڕۆ 5 ژنی ئەفریقی لە گوندی سونێی سەر بە قەزای پشدەر گیریان خوارد بوو، ئەمڕۆ لەلایەن بنكەی بەرەنگاربوونەوەی تاوانە رێكخراوەكانەوە گوێزرانەوە بۆ شاری رانیە ‌و هەوڵی چارەسەركردنی كێشەكانیان دەدرێت.

بەپێی بەدواداچونەكانی تۆری میدیایی (تەوار) لە دەڤەری راپەڕین، ئەو 5 ژنە بیانییە 3 مانگ لەمەوبەر لە وڵاتی ئێرانەوە بە رێگەی قاچاخ هاتبوون بۆ هەرێمی كوردستان بەمەبەستی كاركردن و لەلایەن هێزە ئەمنییەكانی هەرێمی كوردستانەوە دەستگیر كرابوون.

ئەمڕۆش دوای ئازاد بوونیان لە زیندان و بەهۆی نەبوونی پاسپۆرت و ناسنامەوە لە سنوری قەزای پشدەر گیریان خوارد بوو، دوا بەدوای بڵاوبوونەوەی ئەم هەواڵە لە تۆڕە كۆمەڵایەتییەكانەوە، دەستبەجێ‌ لایەنە پەیوەندیدارەكان هاتنە سەر خەت و لەلایەن پۆلیسی راپەرینەوە گوێزرانەوە بۆ بنكەی بەرەنگاربوونەوەی تاوانە رێكخراوەكانەوە.

موقەدەم هەڵگورد، وتەبێژی بنكەی بەرەنگاربوونەوەی تاوانە رێكخراوەكان بە تۆڕی میدیایی تەواری راگەیاند: ئەو كرێكارانە ئێستا لامان پارێزراون و بەیانی دەبرێنە بەردەمی دادوەر و بە هەموو شێوەیەك هەوڵ دەدەین كێشەكانیان بۆ چارەسەر بكەین.

ژێوار خدر، ڕانیە

هاوشێوە

ڤیدیۆ