بۆ یەكەمجار لەمێژووی ئەو وڵاتەدا، ژنێك وەك یەكەمین سەرۆكی ژنی هندۆراس سوێندی یاسایی خوارد.

خاتوو زیومارا كاسترۆ رۆژی پێنجشەممە لەمەراسیمی سوێندخواردنەكەیدا كە خاتوو كامێلا هاریس جێگری سەرۆكی ئەمریكا ئامادەی بوو، رایگەیاند كە ئەو سەركردایەتی وڵاتێكی رووخاوی گرتووەتە دەست ‌و بەڵێنیدا هەوڵ بۆ بەدیهێنانی دادپەروەریی كۆمەڵایەتی و شەفافییەت بدات.

زیومارا تەمەنی 62 ساڵە و بەڵێنیداوە رووبەڕووی گروپەكانی بازرگانیكردن بەمرۆڤ‌و ماددەی هۆشبەر بێتەوە، هەروەك بەڵێنی هەموار كردنی ئەو یاسایانەی داوە كە بۆ لەباربردنی منداڵ لە وڵاتەكەی دانراون.

پێشتر مانوێل زێلایای مێردی زیومارا لە ساڵی 2006 تاوەكو 2009 سەرۆكی ئەو وڵاتە بووە و دواتر بە كودەتایەكی سەربازی لەسەر كار لادراوە، دوای لابردنی مێردەكەی لەدەسەڵات، زیومارا دوو جار خۆی بۆ پۆستی سەرۆكایەتی وڵاتەكەی كاندید كرد‌و سەركەوتوو نەبوو.

لە دوا هەڵبژاردنی هندۆراسدا كە مانگی تشرینی دووەمی 2021 بەڕێوەچوو، خۆی كاندید كردەوە‌و توانی سەركەوێت ‌و ببێتە یەكەم سەرۆكی ژن لە مێژووی ئەو وڵاتەدا.

دڵی، ئاژانسی فرانس پرێس