ئەمڕۆ لەتەلاری تەوار، بەئامادەبوونی خاتوو كافیە سلێمان سكرتێری یەكێتی ژنانی كوردستان‌و خاتوو تەلار لەتیف‌و بەشی یاسایی (ی. ژ. ك)، بەمەبەستی گەڵاڵەكردنی سەرنج‌و پێشنیارەكانی یەكێتی ژنانی كوردستان بۆ یاسایی توندوتیژی خێزانی و پێشكەشكردنی بەپارلەمانی كوردستان كۆبونەوە.

لەكۆبونەوەكەدا دوای تاوتوێ‌ كردن‌و ئاڵۆگۆڕكردنی بیرو را لەسەر ئەو یاسایە، سەرنج‌و پێشنیارەكانی یەكێتی ژنانی كوردستان لەسەر ئەو یاسایە گەڵاڵە كرا‌و بڕیارە پێشكەشی پارلەمانی كوردستان بكرێت.

ئەم كۆبونەوەیە دوای ئەو ۆرك شۆپەی لیژنەی داكۆكیكردن لەمافەكانی ژنان لەپارلەمانی كوردستان دێت، كە تایبەت بوو پێشنیازە یاسای بەرەنگاربوونەوەی خێزان لەتوندوتیژی لەهەرێمی كوردستان.

لەو ۆرك شۆپەدا كە لەئوتێل شیراتۆن لەشاری هەولێر ئەنجامدرا، باس لەوەكرا كە خوێندنەوەی یەكەم بۆ رەتكردنەوەی ئەو یاسایە كراوە كە ساڵی 2011 لەپارلەمانی كوردستان دەرچووە.

لەو ۆرك شۆپەدا كە پارێزەر خاتوو گوڵان بەختیار وەك نوێنەری یەكێتی ژنانی كوردستان ئامادەی بوو، بڕیار درا هەر رێكخراو‌و كەس‌و لایەنێك، پێشنیار‌و سەرنج‌و راسپاردەكانی خۆی لەسەر ئەو یاسایە بەنوسراوی فەرمی پێشكەشی پارلەمانی كوردستان بكات.