بەیان محەمەد ، نوسەر و شاعیر و رۆژنامەنوس، ئەندامی دەستەی كارگێری كۆمەڵەی كەلەپوور و فۆلكلۆری كوردە، لە چاوپێكەوتن تایبەت بە ماڵپەرەی تەوار باس لە ئەزمونی نوسین و ئەدەبی خۆی دەكات. دەڵێت” شیعر هەناسەیەكی جوانی شاعیرە گوزارشت لە هزری دیوی ناوەوەی ژیانی شاعیر دەكات، هەندێكجار بوێرانە و هەندێجاریش بەشێوەیەكی ڕەمز، واتە هێمای شاراوە و نهێنی مەبەستەكەی بەخوێنەر دەگەیەنێت، سەرەتا دەستپێكی شیعر نووسینی من دەگەڕێتەوە بۆ دوای ئاوێزان و وابەستەبوونم بەچلچرای میتۆدە ڕەنگاڵەییەكانی پەڵكەزێڕینەی جوانكاری و ڕستە و پەیڤە شیرینەكان، ئینجا توانیم دەستە چینەی شیعر بۆ خۆشكردنی گڕی شیعر ببەم و لە پەنچەرەی ماڵی شیعر بدەم، لەودەمەوە تاوەكو ئێستە وابەستەی شیعر نوسین بووم و مەحاڵە بتوانم لێی جیاببمەوە”. هەروەها لەبارەی ژنانی شاعیرەوە ووتی” لە هەموو كات و سەردەمێكدا بوێری ڕۆڵی خۆی دەبینێت بۆ ڕەخساندنی خستە ڕووی پەیامە پیرۆزەكانی ژنان، ئەگەر دیقەت لە خەرمانەی مانگ و ئەستێرەی ئەفراندن و تواناكانی خاتوو ”مەستورە” ی پرشنگدار بدەین، لە كات وسەردەمی ڕۆژگاری ئەردەڵاتەكاندا شیعری نووسیووە و یەكەم ژنیشە، كە مێژووی ئەردەڵانیەكانی نووسیووە، ئەمەش بە پێشەنگی ژنانی كورد دادەنرێت، لەوكاتەوە تاوەكو ئێستە دەیان ژنی شاعیر و نوسەر و وەرگێڕمان هەیە، شوێن دەستیان لە بوارە جیاجیاكانی ئەدەبدا دیارە و جێگەی شانازین.
وەك كەسێكی شارەزا لە بواری كەلپور و كلتوری كوردیدا خاتوو بەیان ووتی” كەلەپور و فۆلكلۆر ناسنامەیە، بۆ سەلماندنی ڕەسەنایەتی نەتەوە، بۆیە هەمیشە داگیركەران ڕێگەیان نەداوە، وەكوو پێویست كار لەم بوارەدا بكرێت، یا فۆلكلۆریستان لە ژێر سایەی ڕەشماڵێكدا كۆبكرێتەوە، كاری تاكە كەسی كراوە. لەدوای ڕاپەڕین بەهۆی دروستبوونی كۆمەڵەی كەلەپوورەوە كاری باشكراوە، ئەرشیفێكی دەوڵەمەندیان پێكهێناوە، كە بووەبە سەرماییەكی گەورە بۆ نەتەوەكەمان ، لەگەڵ ئەوەشدا وەكو پێویست هاوكاری ناكرێین”. هەروەها وتیشی” پێویستە لە قۆناغی سەرەتاییەوە هەتاوەكوو زانكۆ بایەخ بە فۆلكۆر بدرێت، بخرێتە مەنهەجی خوێندنەوە، لەگەڵ ئەوەشدا بایەخی تەواو بە مۆزەخانەكان بدرێت”.
دەربارەی كاری داهاتووی بەیان محەمەد دەڵێت ” كات بۆ خوڵقاندنی شیعر دانانرێت، چونكە وەك هەور و باران وایە كە پڕبوو دادەكات، بەڵام نوسین دەبێت كاتی بۆ تەرخان بكەین، ماوەی چەند ساڵێكەپەندی پێشینانی جیهانم لە زمانی فارسییەوە كردووە بەكوردی و ئێستا ئامادەیە بۆ چاپكردن، لەگەڵ ئەوەشدا هۆنراوەكانم ئامادەیە و بەنیازی چاپكردنیانم”.
لەبارەی رێزلینانی كۆمەڵەی كەلەپور و فۆلكلۆری كوردیشەوە كە بەخشیانە خاتوو بەیان ووتی” ڕێزلێنانیش گرنگی تایبەتی خۆی هەیە، ئەویش لە ئاكامی بەرجەستەكردنی كار و چالاكیەكی زۆر بەسەردەكرێتەوە، ڕێزلێنانی بۆ دەكڕێت، دواتر دەبێتە هاندەرێكی باش بۆ زیاتر كاركردن، بەسوپاسەوە دەستەی كارگێری كۆمەڵەی كەلەپوور بۆ ئەمساڵ منیان دەستنیشانكرد، ئەو ڕێزلێنانە جوانەیان بۆ سازكردم، لە تیانوسی مێژووی ژیانی مندا بوو بە ڕۆژێكی ڕەنگین كە هەرگیز لە یادی ناكەم”.
یەكێك لە دەقەكانی خاتوو بەیان بۆ ژنێكی سەوزە فرۆشی شەقامی مەولەوی
خەوێكی خۆش
لە دڵی مەولەویدا
داپیرەیەكی
شەكەت و ماندوو
لە ئامێزی ریشەسپیكەی
مەولەویدا
بە دیار پەیداكردنی
قوتی ڕۆژانەیەوە
خەوی لێكەوتووە!
تەواوی یادەوەریەكانی
لەو خەوەدا بینی بەجوانی
كراسێكی گوڵگوڵی
سپی لە بەردایە
زاواش بەدڵێكی خۆشەوە
لە بەردەرگایە
نەرمە غاری سوارچاكان
لە دامێنی
كەڵەكە بەردی پیاو چاكان
هەڵپەڕكێ و ڕەشبەڵەكی
زەردوو سور
سەرنجی خەڵكی
رادەكێشێ لە دوور
خواردنی
بە دار لێنراو
بۆن و بەرامەی
خۆشی پڵاو
سێبەری
بن تاشەبەردی چیا
تەپ و تۆزی
بن پێی مەڕ و بزن
سەمفۆنیای
شمشاڵی شوان بەجیا
تابلۆی تووی
تەنگە قەوی سەركانی
دیمەنی شۆڕە ژن
گۆزەوا لە سەر شانی
بە ناو ئاوایدا
رێدەكا بە جوانی
لە پڕ دەنگێكی
زبری شارەوانی
لە وخەوە بەخەبەری هانی
وتی:
هەستە لەویا
پیادە ڕێیە
شوێنی خەڵكە
چۆڵیكە ئەو جێیە!!
ئا:تریفە
