ئەمڕۆ بەڕێز قوباد تاڵەبانی بەبۆنەی لەدایكبونی یاموری كچی یەكەم شەهیدی پاراستنی ژنان، شەهید محەمەد لەتیف پەیامێكی بڵاوكردەوە ‌و تیایدا وێرای دڵخۆش بوونی بەلەدایكبوونی یامور، هاوكات داوای لێبوردنیشی لێدەكات كە تائێستا بكوژانی باوكی دەستگیر نەكراون.

^{دەقە پەیامەكە}:

بە بیستنی هەواڵی لە دایكبوونی یامور، كچی یەكەم شەهیدی رێگای پاراستنی ژنان، شەهید محەمەد لەتیف، دڵخۆشبووم. پیرۆزبایی لە دایكی و خانەوادەكەی دەكەم. چاوەڕێی ئەو رۆژە دەكەم، كە خۆم بتوانم بە یامور بڵێم باوكی كەسێكی قارەمان بوو، لە پێناوی پاراستنی ژیان و كەرامەتی ژنێك خۆی و هاوڕێكانی كەوتنە بەردەم مەترسی و هێرشی تاوانباران و بە داخەوە شەهید كرا. هەروەها دەمەوێت داوای لێبوردن لە یامور و یاران-ی خوشكی بكەم كە زیاتر لە ٩٠ رۆژە چاوەڕێن بكوژانی باوكیان دەسگیربكرێن، بەڵام هەر چۆن لە سەرەتاوە دڵنیایم دا، ئێستاش دووبارەی دەكەمەوە كە هێزە ئەمنییەكان كاری خۆیان دەكەن و خۆشم لەنزیكەوە چاودێریی بەدواداچوونەكان دەكەم هەتا ئەو رۆژەی مژدە و هەواڵی دەستگیركردنی بكوژانی شەهید محەمەد دەبەم و لەدەرگای ماڵی یامور و یاران دەدەم.