وەزارەتی تەندروستی حكومەتی هەرێمی كوردستان لە نوسراوێكیدا رایگەیاند: لەبەر بەرژەوەندی گشتی ئاسایشی خۆراك و سەلامەتی هاوڵاتییان، پاش بڵاوبوونەوەی دەنگۆی پیسبوونی هەندێك لە بەرهەمەكانی نەستەلەی كیندەر لە جۆری Kinder Surprise MAX، بریار درا بە كێشانەوە و راگرتنی هاوردەی ئەو بەرهەمە بۆ هەرێمی كوردستان.
دەقی نوسراوەكەی وەزارەتی تەندروستی:
لەبەر بەرژەوەندی گشتی و ئاسایشی خۆراك و سەلامەتی هاوڵاتیان، پاش بڵاوبوونەوەی دەنگۆی پیسبوونی هەندێك لە بەرهەمەكانی نەستەلەی كیندەر لە جۆری Kinder Surprise MAX بە باج نەمبەری L004L03 وە L005L03-AD كە لەوڵاتی بەلجیكا بەرهەم هێنرابوو بە بەكتریای سالمۆنێلا كە ڕێكەوتی بەسەرچوونیان ١/١٠/٢٠٢٢، وە ئاماژە بە كۆنووسی لیژنەی پێكهێنراو لە وەزارەتی تەندروستی ژمارە (٢٣٠٩) لە ڕێكەوتی (١٠/٤/٢٠٢٢) و نوسراوی حكومەتی فیدراڵ ژمارە ٦٧٨ لە ١٠/٤/٢٠٢٢ بڕیارماندا بە:
- لێكۆڵینەوەكردن لە سەرچاوەی ئەو بەرهەمە لە هەرێمی كوردستان و دەستنیشانكردنی كۆمپانیای هاوردەكار و دابەشكەر‌و دیاریكردنی خاڵە سنووری یان فرۆكەخانەكان كە لێوەی هاوردە دەكرێت.
- كێشانەوەی هەموو بەرهەمەكانی كیندەر بەو باج نەمبەرانەی سەرەوە كە لەوڵاتی بەلجیكا بەرهەمهێنراوە.
- قەدەغەكردنی هاوردەكردنی ئەو بەرهەمانە بە باج نەمبەری ئاماژەپێكراو بۆ ناو هەرێمی كوردستان لە خاڵە سنورییەكان و فرۆكەخانەكان تا یەكلایكردنی ئەو بابەتە لەوڵاتە پەیوەندیدارەكان.
- وەرگرتنی نموونەی پشكنین لەو بابەتانە بەشێوەی هەڕەمەكی‌و پشكنینكردنیان بۆ دڵنیابوون لە شیاوبوون و سەلامەتی ئەو بەرهەمانەی سەرەوە لەلایەن هاوڵاتیان.
- پێویستە كاردانەوەی بەپەلە ئەنجام بدرێت لەڕێگەی تیمەكانی تەندروستی بەڕێوەبەرایەتی خۆپارێزی و پاراستنی تەندروستی بۆ جێبەجیكردنی ئەو بڕیارانەی سەرەوە.
