دوای چوار رۆژ لە هەڵاتنی ئەو پیاوەی كە لە سلێمانی هاوسەرەكەی دابووە بەر چەقۆ، شەوی رابردوو ئاسایشی سلێمانی دەستگیریكرد.
سەرچاوەیەك لە ئاسایشی سلێمانی رایگەیاند: “شەوی هەینی رابردوو دوای بڵاوبوونەوەی هەواڵی لێدانی چەقۆ لەلایەن پیاوێكەوە لەهاوسەرەكەی خۆی، بەڕێوەبەری گشتیی ئاسایشی سلێمانی تیمێكی تایبەتی راسپارد بە پەیوەندیكردن بە خانەوادەی ژنەكە و گوێگرتن لە داواكاریی و دۆخی بریندارەكە، هەمان شەو بڕیاردرا هاوسەری ئەو ژنە دەستگیر بكرێت”.
سەرچاوەكەی ئاسایشی سلێمانی وتیشی: “دوای لێكۆڵینەوە و بەدواداچوونی وردی تیمەكانی ئاسایش، درەنگی شەوی رابردوو، توانرا هاوسەری ئەو ژنە كە چوار رۆژ بوو خۆی شاردبووەوە، دەستگیربكرێت و دۆسییەكەی نێردراوە بۆ بەشی یاسایی و بۆ دادوەری تایبەتمەند”.
لای خۆشییەوە خاتوو ئاشتی عەبدوڵا بەرپرسی بەشی جێندەر لەنووسینگەی قوباد تاڵەبانی جێگری سەرۆك وەزیرانی حكومەتی هەرێمی كوردستان رایگەیاند: سوپاس و دەست خۆشی بۆ هێزە ئەمنییەكانی هەرێمی كوردستان، كە لەماوەی دوو رۆژی رابردوودا بكوژی ئەو دوو ژنەیان دەستگیركرد، كە لەهەولێرو دهۆك كوژرابوون.
وتیشی: “دەستخۆشی لە هێزە ئەمنییەكانی سلێمانی دەكەین، كە شەوی رابردوو ئەو تۆمەتبارەیان دەستگیركرد كە ١٢ چەقۆی لەهاوسەرەكەی دا و هەڵهاتبوو”.
