بەمەبەستی پێشكەشكردنی یاداشتێك لەسەر كێشە‌و گرفتەكانی دەزگاكانی راگەیاندن لەكاتی روماڵی هەواڵەكانی ژن‌و كوشتن‌و رەچاو نەكردنی باری دەروونی هاوڵاتیان، رێكخراوەكانی ژنان لەسلێمانی سەردانی وەزیری رۆشنبیری حكومەتی هەرێمی كوردستانیان كرد.

لەیاداشتەكەیاندا ئەو رێكخراوانە ئەو كێشانەیان خستۆتە ڕوو كە دەزگاكانی راگەیاندن لەكاتی روماڵكردنی هەواڵ‌و راپۆرتەكانی كوشتن ژنان و یاخود خۆ كوژی ژنان هەیانە، هەروەك لەو هەواڵ‌و راپۆرتانەیاندا رەچاوی باری دەرونی هاوڵاتیان ناكەن.

یاداشتەكەی ئەو رێكخراوانە، رێگە چارەشیان بۆ كێشەكان‌و كەمكردنەوەی ئەو دیاردەیە خستبووە ڕوو.

لای خۆشییەوە حەمەی حەمە سەعید وەزیری رۆشنبیری وتی: “راگەیاندن لە هەرێمی كوردستان تەنیا خۆی لەو كێشانە نا بینێتەوە كە ئێوە لەو یاداشتەدا باستان كردە، بەڵكو زۆر كێشەی دیكەی هەیە كە هۆكارێكی زۆرە‌و ناتوانرێ بە ئاشكرا باس بكرێت”.

سەبارەت بەیاداشتەكەی ئەو رێكخراوانە وەزیری رۆشنبیری وتی: “ئێمە هەوڵی جدیمان داوە بۆ ئەو باسە بۆ ئەوەی دیاردەی وا لە دەزگاكانی راگەیاندن روونەدات، بەڵام لەبەرئەوەی وەك وەزارەتی رۆشنبیری یاساییەك نییە كە خۆمان بتوانین راستەوخۆ سزای ئەو دەزگایانە بدەین، بۆ ئەبێت بگەرێینەوە بۆ داواكاری گشتی و ئەو سكاڵا بكات و لێكۆلینەوە بكات، ئێمە تەنیا ئاگاداریان ئەكەنەوە لەو رووداوانە”.

وتیشی: “من پشتگیری تەواوتان ئەكەم لەم باسەدا و هەموو هەوڵێكی خۆمان ئەدەین كە ئەو رووداوانە بەو شێوەیە نەگوازرێتەوە”.

پێشنیاریشی كرد كە : سێ‌ كەس وەك نوێنەری رێكخراوەكانی ژنان دیاری بكرێت ‌و سەردانی لیژنەیەكی تایبەت بەو بابەتە بكەن لە وەزارەت لە شاری هەولێر بۆ ئەوەی هەموو لایەكمان بەیەكەوە هەوڵی جدی بدەین‌و چیمان پێبكرێت بیكەن بۆ چارەسەركردن و نەهێشتنی ئەو بابەتە”.

ئا: پروشە