تریفە حسن: سلێمانی
كچە هونەرمەندی لاو (گوڵان جەمال) كە دەرچووی بەشی شێوەكاری پەیمانگەی هونەرەجوانەكانی سلێمانی وكۆلێجی هونەری زانكۆی سلێمانیە لە ئێستادا خاوەنی ستایلی تایبەت بەخۆیەتی و لەرێگەی رەنگ و هێڵەكانەوە باس لە دڵگیری سروشتی كوردستان دەكات.
لە چاوپێكەوتنێكی تایبەتدا گوڵان لە تۆری میدیای تەوارەوە باس لە ئەزمونی هونەری خۆی دەكات و دەڵێت” كاركردنم پڕبوو لە ئەزموونی نوێ وكاری جۆراو جۆر، كە لە ئەزموونی چەند ساڵەمدا كۆمەڵێك كاری هونەری هاوچەرخ و تابلۆ كارم كردووە بە بابەتی جیاواز، بەڵام لە كۆتایدا ستایلی كاركردنی خۆمم دۆزیەوە”.
گوڵان وتیشی” تابلۆكانم لەسەر بابەتی سروشت و بەتایبەت گوڵاڵە سورەن كە بە چەندین شێواز و ستایل و پێوانەی جیاواز و بە بۆیەی پاستێلی وشك و زەیتی و ئەكریلیك كارم تیا كردوون.
لە بارەی بوونی گوڵاڵە سورە لەبەرهەكانیدا ووتی” بابەتی گوڵاڵە سورەم بۆیە هەڵبژارد یەكەم وەك سمبولێك تایبەت بەخۆم. دووەم ئەم جۆرە گوڵە شتێكی سروشتی و جوان و تایبەتە بە سروشتی كوردستان”.
گوڵان لێرەوە پرۆژەی هونەری داهاتووی ئاشكراكردوو ووتی” پڕۆژەی ئایندەم هەر لەسەر بابەتی گوڵاڵە سورە ئەبێت. كە پێكدێن لە كۆمەڵێك تابلۆی گەورە و بە بۆیەی پاستێلی وشك و ئەكریلیك و زەیتی. ڕەنگە پێشانگەیەكیتر بكەمەوە تایبەت بە هونەری هاوچەرخ”.
