میهرەبان: هەڵەبجە
شیعر ئەو هەستە خوداییە كە مرۆڤە لە رێگەی زمانێكی پاراو و شیرنەوە دەتوانێ گوزارشت لە خودی خۆی و دەوروبەری بكات. زۆرێكیش لە ژنان هەن كە هەمیشە بە هەستی ناسك و قەلەمی بە پێز هەستەكانیان دەردەبڕن.
ئارەزوو عبدالخالق لەدایكبوی ساڵی(1980)یە و لە ئێستادا وەك یەكێك لە شاعیرەكان بۆتە جێگەی سەرنجی كۆمەڵگە و جگە لە نوسین سەرپەرشتیاری چالاكی دیدەوانی سلێمانیە.
لە لێدوانێكیدا بۆ سایتی تەوار باسی لەسەرەتای نوسینی شیعری خۆی كردوو ووتی” لەساڵی(1996)وە ئەنوسم و سەرەتا بە نوسینی چیرۆك و شیعری مناڵان دەستمپێكرد، لە ئێستاشدا شیعر بۆ من خۆراكی ڕۆحە، شیعر بۆ ئەوكەسانە ئەنوسم كە شیعردۆستن”.
ئارەزوو خاوەنی ئەلبومێكی شیعرە كە لەرێگەی تۆماری دەنگییەوە لە پەیجی فەرمی خۆی لە سۆشیال میدیا بڵاوی كردۆتەوە و رایشگەیاند ” كە بەرهەمی چاپكراوی لەئایندەیەكی نزیكدا بڵاو دەبێتەوە”.
ئەو پێیوایە” كە شیعر ئەبێت ئاوێتەی ناخی گەل و كێشەكانی كۆمەڵگە بێت” هەروەها وتیشی” قەڵەمی نوسینم بۆ مرۆڤایەتیە بەڵێ سەرلەبەری نوسینی ژنە پەیامم بۆ ژنانە. پەیامم ئەوەیە ژنان با تەنها ئامانجیان خۆڕۆشنبیركردن بێت”.
