ئەوە ژنە خۆی دەكاتە گیای تەر و كەروێشكەی خۆشەویستی تیا ئەكات”
سۆزان مامە شاعیر و نوسەر لە ئێستادا لە شاری سلێمانییە و چەندین دیداری ئەدەبی رێكدەخات، سۆزان باس لەوە دەكات كە لە مانگی گەلاوێژی ساڵی ٢٠٢١ گەراوەتەوە و چەند چالاكییەكی هەبووە وەك كۆڕی شیعری و دیداری ئەدەبی و چاوپێكەوتنی رۆژنامەیی، ئەو دەڵێت” ئەگەر لە دەرەوەی وڵات یان لە ناوكوردستانبێ هەمیشە پەیوەندییەكی پتەوی لەگەڵ دۆست و هاورێیانی و ئازیزانیدا هەیە و هەموووكات وابەستە دەبێت بەرایەڵەیەی پەیوەندی نەپساوەكانیەوە”.
لە دیدارێكی رۆژنامەوانیدا خاتوو سۆزان بە زمانی شیعر بۆ سایتی تەوار دوواو ووتی” وەك دەزانرێت ئەو كەسەی ئەگەر بە خولیاوە قەڵەمی گرت ناتوانێت لێی دابڕێت، كاتێك كە دەنووسم كات و شوێن لە هزرمدا بوونی نییە، بە دیدیێكی كوردانەوە دەنووسم هەمیشە گەشتی و شەكانم دەمباتەوە بۆ لای رۆحە كوردەوارییەكە و پەیامی نووسینیشم بۆ ئەوەیە كە بڵێم من هەم بەو واتاییەی پیشاندان و گوزارشكردن لە بوونی تاكێك كە چەندان ساڵە ئەوەی كە تا ئێستا هێشتویەتییەوە زمانەكەیەتی. كە پێموایە شیعر نووسینیش پاراستنی ئەو كەڵچەرەیە بۆیە ئەو شیعرانەی كە بەزمانی كوردی دەیاننوسم بۆن و بەرامەی نێرگز و خۆڵە پەتانێی نیشتمانی لێدێت”.
دەربارەی ئەوەی كە خەیاڵی ژن تاچەند دەتوانێ ڕێچكە شكێنبێت لە بەردەم ئەو زەبرە دەرونیەی لە سەرێتی سۆزان مامە ووتی” ژن هەمیشە دەتوانێت جەسور و رێچكە شكێنبێت لە هەر كایەكی ژیاندابێت ئەگەر بیەوێت، وەلێ دەبێت بزانێت چۆن گوزارش لە دونیای خەیاڵاتیدا دەكات. چونكە تەڵزگەكان زۆرن ئەمە نەك هەر بۆ توخمی مێینە بگرە بۆ توخمی بەرانبەریش بە هەمان شێوە. قەڵەمی من قەڵەمێكی جەسورانەیە لە ژیانی و كایەی ئەدەبیمدا. سەرەتای نووسینم لەو جەنگە دەروونیەدا بووم لە گەڵ دەورووبەر مەبەستم خولگەی كۆمەڵایەتی و خولگە بەنا و رۆشنبیرییەكە، بەڵام هەنوكە خۆم بە براوە دەزانم چونكە هەمیشە خۆم دیارخەربووم نەك دیارخراو”.
سۆزان عەبدوڵا، ناسراو بە سۆزان مامە .
لە گەڕەكی سەرچنار لە شاری سلێمانی لە دایكبووە قۆناغەكانی خوێندنی سەرەتایی، ناوەندی و دواناوەندی لە سلێمانی تەواو كردوە . لە ساڵی ١٩٩٦-١٩٩٥بڕوانامەی بەكالۆریۆسی لە زمان و ئەدەبی كوردی لە كۆلێجی پەروەردە لە زانكۆی سەڵاحەدین بەدەستهێناوە. لە ساڵی٢٠٠٤ بڕوانامەی ماستەری لە ئەدەبی كوردییدا بەدەستهێنا بە ناونیشانی (كەسێتی ئافرەت لە ڕۆمانی كوردیدا١٩٩١ -٢٠٠١).
ساڵی ٢٠٠٥ لە بەشی كوردی لە پەیمانگەی مامۆستایان لە شاری سلێمانی بۆ ماوەی ساڵێك مامۆستابووە دواتر راژەی گواستۆتەوە بۆ كۆلێجی پەروەردەی بنەرەت لە زانكۆی سلێمانی و بووە بە مامۆستای یاریدەدەر و تا كۆتایی ساڵی ٢٠٠٩. دواتر چۆتە دەرەوەی كوردستان و لە شاری لە ندەن نیشتەجێ بووە. لە ئێستادا لە لە ندەن خەریكی خوێندن و كاروباری رۆشنبیری و كلتورییە .
لەكۆتایی هەشتاكانی سەدەی رابردوەوە ئارەزووی نووسینی هۆنراوەی هەبووە، لە ساڵی ١٩٩٤ وەك رۆژنامەنووس لە رۆژنامەی هەرێم كە ئەوكات لە شاری هەولێردەردەچوو لە پاڵ خوێندنەكەی بۆ ماوەیەك كاریكردووە .
هۆنراوە و نوسینەكانی لە ڕۆژنامە و گۆڤارەكانی ئەو كاتەدا بڵاوكردۆتەوە. چەندین كۆڕی شیعری لە هەموو شار و شارۆچكەكانی كوردستاندا بە تەنها و بە هاوبەشیكردووە و بەشداری دەیان ڤیستیڤاڵ و كۆنفرانسی كلتوری نیودەوڵەتیی لە دەرەوەی وڵات لە (ئێران ،سوریا، ئەردەن، لەندەن ) كردووە و بۆ ئەو مەبەستەش كۆمەڵێك خەڵاتی پێبەخشراوە، لەساڵی ١٩٩٨ لە ڕۆژنامەی ئاڵای ئازادی برەوی داوە بەكاری ڕۆژنامە نووسی سەرەتا وەك بەرپرسی لاپەڕەی كاروباری ژنان و پاشان وەك سكرتێر و دواتر وەك جێگری سەرنووسەر.
وێڕای هەموو ئەمانەش خاوەنی دەیان تویژینەوەی ئەدەبی و رۆژنامەوانییە لە گۆڤارە باوەڕپێكراوەكاندا بڵاو كراونەتەوە.
لە كتێبە چاپكراوەكانی -شەقامی ڕۆح، نامیلكە شیعری هاوبەش /١٩٩٦
سێشەمە شیعرییەكانی تۆڕنادۆ، شیعر، دەزگای زاموا /١٩٩٩
ژن و گەڕان بە دوایی ناسنامەدا، نووسین و بەدواداچوون، وەزارەتی ڕۆشنبیری/٢٠٠٢
ژنانی ڕاگەیاندكار لە سەردەمی ڕژێمی عیراقدا، نوسینێكی رۆژنامەوانی لە نیو كتێبی ساڵانەی ڕێكخراوی وادی ئەڵمانی،كە بە زمانی ئەڵمانی ساڵی ٢٠٠٤ بڵاو كراوەتەوە .
دەقی (ژنكوژ ) لە كتیبی ژن ژیان دەنووسێتەوە بڵاوكراوەتەوە كە ماڵی كتێب بە هاوكاری وەزارەتی ڕۆشنبیری بەچاپی گەیاندووە /٢٠١٩
دیداری/ ترێ محمود
