میهرەبان : هەڵەبجە
ژنان و كچانی هەڵەبجە بەردەوامن لە دەرخستنی تواناكانیان و بوونەتە جێگەی سەرنجی بینەرەكانیان. خاتوو بەهرە ئەحمەد یەكێكە لەو بەهرەمەندانەی كە سودێكی زۆری لە سۆشیال میدیا وەرگرتووە و لە ڕێگەی تۆڕە كۆمەڵایەتییەكانەوە گەشەی بە هونەرەكەیداوە و دووبارە ئەو كەلوپەلی بەكارهاتوو دەكاتەوە بە بەرهەمی هونەری و تابلۆی لێدروستدەكاتەوە وەك خۆی دەڵێت” ئیشی هونەری لەگەڵ ڕۆژگاردا گەشە دەكات”.
بەهرە ئەحمەد دەڵێت” كاری هونەری ئاسان نییە و خەڵك وەك پێویست نرخی هونەر نازانن، ئەو تابلۆیانەی كە دروستی دەكەم ئەگەر داوای هەر بڕە پارەیەك بكەم كڕیار بە گرانی دەزانێت، بەڵام ئامادەن پارە بدەن بە گوڵی هاوردە”.
خاتوو بەهرە دەرچووی بەشی ئیدارەی تەندروستیە و باس لەوە دەكات بڕوانامەكەی نەیكردووە بە هیچ و بەڵكو لە ڕێگەی كارە دەستیەكانیەوە بژێوی خۆی دابین دەكات. هەروەها وتیشی” لە ئێستادا گرنگ حەز و ئارەزووە، نەوەك بڕوانامە، بۆ نمونە من پزیشكێك دەناسم لە نەخۆشخانە دەوام دەكات، بەڵام خولیاكەی پشتگوێ نەخستووە”.
بەهرە خان بەو پەڕی خۆشەویستییەوە وەسفی یەكێك لە تابلۆكانی خۆی كردوو ووتی” هەوری لەچك و كوڵوانە و كراس، لە تابلوكەی من نەخشاوە ئەم كارەم زۆر جوان و نازدارە لەلام من زۆرینەی كات جلی كوردی لەبەر ئەكەم و پارچەیك لە جلەكانم هەوریە من پێموایە عاشقی هەر شتێك بوی دەبێت لە ژیانتا ڕەنگ بداتەوە”.
