دالیا موردا ئەو ژنە شێوەكارەی كە خاوەنی ستایلێكی شێوەكاری تایبەت بەخۆی بوو، ئەو دەویست دنیا لە دیدێكی ژنانەوە رەنگ بكات و فەزایەك لە جوانی و ئارامی وەك رۆحی ژن بخوڵقێنێت. بەداخەوە مەرگ مەودای نەداو سەرلەبەیانی ئەمرۆ بۆ دواجار ماڵئاوایی لە هونەرەكەی و دۆستان و خانەوادەكەی كرد.
دالیا محەمەد موراد ساڵی (١٩٧٥) لە شاری سلێمانی لە دایكبووە، ساڵی (١٩٩٦) بەشی شێوەكاری پەیمانگەی هونەرە جوانەكانی سلێمانی تەواوكردووە، لە (١٩٩٩) یەكەمین پێشانگەی تایبەتی خۆی بە ناوی (ڕێژنە) لە هۆڵی مۆزەخانەی سلێمانی كردەوە. لە كاتی كردنەوەی گەلەری تەوار یەكێك بوو لەو هونەرمەندانەی كە بەعەشقەوە كاری كرد بۆ كۆكردنەوەی ژنە شێوەكارەكانی شاری سلێمانی و هاوكار و پشتیوانی كردنەوەی گەلەری تەوار بوو، لە (٢٠٠٣ – ٢٠٠٩) وەك مامۆستای هونەر چەندین كار و پێشانگەی بۆ منداڵان سازكردووە و خاوەنی چەندین بروانامەی ڕێزلینانە و ئەندامی كارای ڕێكخراوی هونەرمەندانی كوردستان بوو. دالیا موراد تا پێش ماڵئاوایكردنی لە ژیان بەشداری لە (٦٥) پێشانگەی هاوبەش كردوو جگە لە بەشداریكردنی لە پیشانگەیەكی هاوبەش لە وڵاتی میسر. هەزاران سلاو بۆ رۆحی پاكت و جێگەت هەرگیز خاڵی نابێت لە نێو هونەری شێوەكاری كوردستاندا.