نوسینی: سوپرالیا: رانیە
بە درێژایی مێژووی شۆرشەكانی كورد ژنان هێزی بیر و بروا و ورەبوون هاوشانی پیاوەكان، ڕۆڵ و كاریگەری گەورەیان هەبووە لە خەباتی نهێنی و چەكداریدا، چ بە شێوەیەكی راستەوخۆ بووبێت یان ناراستەخۆ بوونە قەڵای هێز بۆ پیاوان و هاوكارییان كردوون، ئەگەر سەیری دەڤەری ڕواندز و دۆڵاكۆ بكەین، لە دێرزەمانەوە ژنان بەشدارییان هەبووە لە دەسەڵاتدا و چەندین ژنی تێكۆشەر لە ڕواندز هەڵكەوتوون، لەوانە ( خانزادی میری سۆران، لەعلی خانی دایكی ئیسماعیل ڕواندزی، فاتمەخان فەقیانەی.. هتد)، لە شۆڕشی نوێشدا و لە سەرەتای سەرهەڵدانی شۆڕدا، كۆمەڵێك لە ژنانی دەڤەری ڕواندز، ڕۆڵێكی كاریگەریان هەبوو، كاتێك خەباتی چەكداری دەستی پێكردەوە ئەو ژنانەی بڕوایان بە خەبات هەبوو هاوشانی هاوسەر و برا و باوكە پێشمەرگەكانیان ڕوویان كردۆتە شاخ.
لە پەنای بەرگری و هەڵمەت و چالاكی پێشمەرگەكاندا، ئەو ژنە تێكۆشەرانەش هاوكار و پشتیوانی پێشمەرگەكان بوون، ئەوان بوونە برین پێچ و ئامادەكاری پێداویستی بەرگری و ئامادەكاری خواردن و جل و بەرگ بۆ پێشمەرگە و هەندێكیش چەكیان لە شان كرد هاوشێوەی پیاوانی شۆڕشگێڕ، ئەو پۆلە ژنە شۆڕشگێڕە ژیانی خۆیان و منداڵەكانیان خستبووە مەترسی و لە پێناو خەباتی ڕەوای گەلی كوردا، لە دوای شەڕی ساڵی (1977)ی گوندی گەرەوان، كاتێ بەهۆی نابەرامبەری هێز و توان سەربازیەكان و بوونی چەند بریندارێك لە هێزی پێشمەرگە، تەواوی گوندەكانی دۆڵاكۆ كەوتنە ژێر دەسەڵاتی ڕژێمی بەعس، هێزی پێشمەرگە شێوازی خەباتیان لە بەرەییەوە گۆڕی بۆ خەباتی پارتیزانی، ئەوە بوو لە بەهاری (1977) چەند ژنێكی تێكۆشەر، لەگەڵ پێشمەرگەكان ڕویان كردە كوێستانەكانی سایە و سێوەك، كە بریتی بوون لە.
( زێزە محمد باپیر، ئامینە احمد قادر، ناز حمدامین قادر، زبێد علی بەگ، فاتیمە حسنە لاو، مریەم حمەد وەسمان، ئایشە حمدامین قادر، حەلیمە حمدامین قادر، عایشە محمود، فاتمە احمد، فاتمە احمد، بەدریە حسێن، نەخشین مستەفا، حلیمە تۆفیق، زبێد وەسمان، زولێخا دەرگەڵەیی، رابیعە عزیز).
دواتر بەپێی گۆرانكاری لە شێوازی خەباتی چەكداری و سەختیەكانی ئەوێ دەمێ، رێژەی ئەو ژنە تێكۆشەرانە زیاد و كەمیان دەكرد، لەگەڵ دەستپێكردنی شەڕی نێوان ئێران و عێراق، بەشێكی زۆری ناوچە شاخاوییەكانی كوردستان كەوتنە دەست پێشمەرگە، لەو قۆناغەدا بەشی زۆری گوندەكان بوونە بنكە و بارەگای هێزەكانی پێشمەرگە، بۆیە چەندین ژنی تێكۆشەر لە شارەكانیش پەیوەندیان بەهێزی پێشمەرگەوە دەكرد و لە خەبات و تێكۆشان بەردەوام بوون. زۆرجار بەرپرسەكانی ئەو دەمە ئاوایان دەوت” گەر بێت و كوردستان ڕزگاری ببێت، ئێوە شایستەی تاجی زێرینن”. بەڵام مخابن هەندێك لەو فەرماندانە شەهید بوون و ئەوانەشی مانەوە توانای بڕیاردانیان نەبوو، هەندێكیش پشتیان كردە بەڵێنەكانیان.