تریفە: سلێمانی
ئێوارەی ئەمڕۆ لە ناوەندی رێكخراوی ئازادبوون ئەكادیمیای ژنۆلۆژی كۆڕی ناساندنی كتێبی گەڕیدەی حەقیقەتیان رێكخست لە نوسینی ناگیهان ئاكارسەل.
لەو ئێوارە كۆڕەدا هەردوو نوسەر كنێر عەبدووڵا و شیرن تاهیر ناساندنیان بۆ كتێبەكە كرد، كە پێكهاتووە لە 400 لاپەرە و نزیكەی پانزە وتاری فكری دەربارەی ژن و ناساینی خودی ژن و تێكەڵ بە فەلسەفەی ژیاندۆستی لە خۆ گرتووە و گوتارەكان سەرجەمیان لە گۆڤاری ژنۆلۆژی بڵاوكراونتەوە.
لەو كۆرەدا خاتوو كنێر عبدووڵا باسی لە تەكنیكی نوسین و ئەو پرنسیپە سەرەكیانە كرد كە ناگیهان لە گەریدەی حەقیقەتدا پشتی پێبەستووە بۆ نوسینی كتێبەكەی لەوانە ( وڵات پارێزی ، ئیرادە و ژنی ئازاد، ئەخلاق و جوانناسی و تێكۆشان).
لەلایەكیترەوە خاتوو شیرین تاهیر دەربارەی كتێبەكە ووتی” گرنگیدانی ئێمە بەم كتێبە، زیاتر پەیوەندی بە ئایدیا و دنیابینی نووسەرەوە هەیە ، جگە لەوەش گرنگیدان بە هەر بەرهەمێكی تیۆریی و فیكریی ژنان هەوڵێكە بۆ گەشەكردنی سەرچاوە مەعریفیەكانی ژن، دەشێ ئەم كتێبە وەك بونیادێكی گرنگ بۆ تێروانین لە ئازادیی و عەشق و حەقیقەت، شەن و كەو بكەین و لە چەندین ڕەهەندی جیاوازەوە مشتومڕ و گفتوگۆی لەسەر بكەین”.
هەروەها وتیشی” دەتوانین بڵیین ئەم كتێبە جگە لە تەكنیكی نووسین ، هاوكات بونیادێكی مەعریفی گرنگە بۆ پێدانی هێز و تێڕوانین لە ئازادی ژن و پیاو و ڕێزگرتنی هەریەكەیان بۆ مافی ئازادی ئەویتر”.
