ئا /ترێ محمود
دڵسۆز حمە یەكێكە لە شاعیر و نوسەرە بە ویقار و دیارەكانی كوردستان و وەك ژنێك جێپەنجەی بە ئەدەبی كوردییەوە دیارە، لە ئێستادا گەراوەتەوە بۆ كوردستان وەك خۆی دەڵێت” گەڕانەوەم بۆ كوردستان بۆ ئەنجامدانی چەندین چالاكی و گەڵاڵە بوونی چەندین پڕۆژەیە، وێڕای ئەوەی بانگێشت كراووم بۆ یەكەمین ڤێستیڤاڵی ڕامان كە ڤێستیڤاڵێكی ئەدەبییە و پێدەچێت ببێتە پڕۆژەیەكی ئەدەبی ساڵانە لە كوردستان”.
دڵسۆز حەمە باسی لە گرنگترین كاری ئەدەبی خۆی بۆ سایتی تەوار كردوو وتی” یەكێك لە پڕۆژە گرنگەكانی ژیانم یەكەم ڕۆمانمە كە لە شاری سلێمانی بڵاومكردەوە بەناوی ( یادەوەری خوێن لە زمانی گوڵەوە)، كە گوزارشت لە ڕووداوە گرنگەكانی ژیانم دەكات، ڕۆمانەكە گێڕانەوەی عەشقێكی گەورەیە، عاشق بوونێكی پڕ ژیان لە ناوەڕاستی شەڕ و نائومێدیدا، پاڵەوان و ئازارەكانی رۆمانەكە زۆر ژنانەن، هەمیشە وێنەی جەنگ و خوێن و كوشتن و كۆڕە و توندوتیژی لە بەرچاوم لاناچن”.
لە بارەی ئەوەی كە چۆن بە شیعر ئازارەكانی دەرنەبڕی و پەنای بردە بەر نوسینی رۆمان دڵسۆز دەڵێت” هەمیشە شیعر لە هەنگاوەكانمدایە، بەڵام خەمەكان هێندە قوڵن شیعر دەرەقەتیان نایەت، بۆیە لە ئێستایا سەرنجی زۆرم لەسەر ڕۆمانە، چونكە نوسینی ڕۆمان بۆ ژنان بەگشتی و ژنانی كورد پێویستە، من پێموایە ڕۆمان بەرزترین پلەی باڵای هەیە، لە بەكارهێنانی زمان و فەنتازیا و بیركردنەوە و هۆشیاریدا”.
شاعیر و نوسەر دڵسۆز حەمە ساڵی١٩٦٨ لە سلێمانی لە دایكبووە، خوێندنی سەرەتای و دواناوەندی هەر لە سلێمانی تەواو كردووە، لە ساڵی ١٩٩٣ كۆلێجی ئەندازیاری بەشی تەلارسازی تەواو كردووە، لە ساڵی ١٩٩٩كوردستانی جێهێشتووە و لە وڵاتی هۆڵندا نیشتەجێیە، زەمەنێكە لە بواری ئەدەبیدا خزمەت دەكات، خەرمانی نوسینەكانی سێ دیوانە، شیعر و ڕۆمانێك و سەدان وتاری جۆرا و جۆرن.
