ئەمڕۆ یەكشەممە خانمە ئەكتەری دیاری میسری (سوهێر ئەلبابلی) لەتەمەنی 84 ساڵیدا‌و دوای ململانێیەكی زۆر لەگەڵ نەخۆشیدا كۆچی دوایی كرد.

سوهێر بابلی ماوەی چەند هەفتەیەك بوو بەهۆی نەخۆشی شەكرەوە رەوانەی بەشی چاودێری وردی یەكێك لەنەخۆشخانەكانی میسر كرابوو، كە بەهۆیە كێشەی هەناسەدانی بۆ دروستبوو بوو كە ئامێری ئۆكسجینی بۆ بەكاردەهێنرا.

خاتوو سوهێر بە بەشداریكردنی لەچەندین شاكاری وەك (مدرسە المشاغبین)‌و (لیلە قبض علی بكیزە و زغلول) جێدەستی خۆی لەمێژووی هونەری عەرەبیدا نەخشاندووە.

سوهێر ئەلبابلی لە 14ی شوباتی 1937 لەناوەندی (فارسكۆر) لەپارێزگای دومیات لەدایكبووە‌و لەشاری مەنسورە گەورە بووە‌و ژیاوە، باوكی مامۆستای بیركاری‌و بەڕێوەبەری ئامادەیی مەنسورەی سەربازی كوڕان‌و دایكیشی ژنی ماڵەوە بووە.

سەرەتای دەستپێكی هونەری پەیوەندی كردنی بووە بە پەیمانگەی باڵای هونەری شانۆ‌و هاوكات پەیمانگەی مۆسیقاوە كە لەیەككاتدا لەهەردوو پەیمانگەكە خوێندكار بووە، دواتر بەشداری شانۆگەرییەكانی (مدرسە المشاغبین)‌و (ریا و السكینە)‌و (نص انا و نص انت) دەكات كە ئەم شانۆگەرییانە هەمیشە لەیادگاری‌و هزری میسرییەكان‌و وڵاتانی عەرەبیدا ماوەتەوە.

ساڵی 1997 واز لەهونەر دەهێنێت‌و حیجاب دەكات، ساڵی 2006 لەرێگەی زنجیرە تەلەفیزیۆنی (قلب حبیبە)ەوە رۆڵ دەبینێت‌و جارێكی تر دەگەڕێتەوە بۆ هونەر. لەژیانی هونەریدا خاوەنی (42) فیلم‌و (16) درامای تەلەفیزیۆنی‌و (12) شانۆگەرییە.

ئەم هونەرمەندە لەژیانی خۆیدا پێنج جار ژیانی هاوسەرگیری پێكهێناوە‌و دایكی كچێكە بەناوی (نڤین)