هونەرمەندی شێوەكار ساكار سلێمان پیشانگەیەكی تایبەت دەكاتەوە ‌و لەگەڵ چاپكردنی كەتەلۆكی كۆی گشتی بەرهەمە هونەرییەكانیدا ‌و پێشمان دەڵێت ئازاد بە.

ژنە هونەرمەندی شێوەكار ساكار سڵێمان لە گەلەری كارگەی كلتوری سلێمانی پیشانگەیەكی شێوەكاری لە ژێر ناوی (ئازادبە) دەكاتەوە، لەم پیشانگەیەدا 38 تابلۆی قەبارە بچوك و یەك تابلۆی قەبارە گەورە و كارێكی ئنستڵیشنی قەبارە بچوكی نمایشكرد، لەگەڵ بڵاوكردنەوەی كەتەلۆكێك كە كۆی بەرهەمە هونەرییەكانی لە خۆگرتووە ‌و لەلایەن پەیمانگەی گۆتەی ئەڵمانییەوە چاپكراوە.

هونەرمەند ساكار سڵێمان تایبەت بە نۆڕی میدیایی تەوار دەربارەی رەنگی سور و رەش كە تاوی پانتایی كارەكانی داگیركردووە ووتی” ناوەرۆكی ئەم پیشانگەیەم لەگەڵ ناونیشانی پیشانگەكە كە ناوی (ئازادبە)یە پێكەوە گونجاندنێكە لەسەر ئەو ئاڵۆزیی قسەكردنەی كە رەنگە لە ناو ناخی زۆرێكدا هەبێت كە جۆرێكە لە نێگەتیڤی، ئەمەش یان قسەكردنی خۆمانە لەسەر خۆمان بەنێگەتیڤی یان قسەی دەوروبەرە دێتە ناومانەوە، بۆیە جۆرێك لە ئاڵۆزی و دەنگە دەنگ هەیە لە ناوەوەی ئێمە، بۆیە من هەوڵمداوە لە رێگەی كارەكانمەوە گوزراشت لەو ئاڵۆزییە بكەم، رەنگە ئەم ئاڵۆزییە لە ناوەوەی خۆشمدا هەبێت بەم تابلۆیانەم جۆریك لە ئازادی چونە دەرەوەی ئەو ئالۆزییە هەستپێبكەم”.

دەربارەی ئەوەی بەكێ‌ دەڵێت ئازادبە ساكار دەڵێت” من بە هەموو مرۆڤێك دەڵێم ئازادبە لە هەموو

ئەو قسە نەگتیڤانەی ناو ناخی كەسەكان، چونكە ئازادی بۆ مرۆڤە چ ژن بێت یان پیاو وەك یەكە و لەوكاتەوەی مرۆڤ دروستبووە ئازادی لەگەڵیدا دروستبووە، بەڵام پرسیارەكە ئەوەیە چی هەیە كە زەوتی دەكات”.

هونەرمەند ساكار سڵێمان یەكێكە لە شێوەكار بە ئەزموونەكانی شاری سلێمانی و خاوەنی چەندین پیشانگەی تایبەت ‌و گشتیە لە ناو كوردستان و دەرەوەی وڵات.

تایبەت: بە تۆڕی میدیایی تەوار