لەژێر ناونیشانی “رێژنە بارانی وشە لە یادەوەری دنیادا دەمانژێنێتەوە” سەرلە بەیانی ئەمڕۆ لە تەلاری هونەر، یەکەمین فێستیڤاڵی نێودەوڵەتی ئەدەبی سلێمانی دەستیپێکرد.
وەزارەتی رۆشنبیریی و لاوان، بەڕێوبەرایەتی گشتیی رۆشنبیریی و هونەری سلێمانی، یەکەمین فێستیڤاڵی نێودەوڵەتی ئەدەبی رێکخست، لە دەستپێکی چالاکییەکانی یەکەم رۆژی فێستیڤاڵدا، هەریەک لە پارێزگاری سلێمانی و وەزیری رۆشنبیری و یەکێتی نووسەرانی کورد وتاری خۆیان پێشکەشکرد، دواتر د.محەمەد عەلی سوڵتانی بابەتێکی پێشکەشکرد. پاشان هەریەک لە شاعیران ( کەژاڵ ئەحمەد و دلاوەر قەرەداخی ) چەند دەقێکی شیعریان پێشکەشکرد. هەروەها بەشێکیتری چالاکیەکانی یەکەم رۆژی فێستیڤاڵەکە نمایشکردنی فیلمێکی دیکۆمێنتاری بوو لەسەر شاری سلێمانی و کردنەوەی پێشانگەیەکی فۆتۆگرافی و پێشانگەیەکی کتێب، ئەم فێستیڤاڵە ماوەی سێ رۆژ دەخایەنێت و چەند دیدارێکی ئەدەبیی بۆ شیعر و رۆمان و شانۆ و چیرۆک و لێکۆڵێنەوە لەخۆدەگرێت.
