خاتوو سەروین عومەر كە ناسراوە بە سەروین دەروێش، یەكەمین شیعری لە تەمەنی ١٣ساڵیدا نوسیووە بە ناوی پێشمەرگە بەشداری چەندین فێستڤاڵ كردووە، كتێبێكی چاپكراوی هەیە ناوی (بەدەم ئازارەوە سەما) چەندین بەرهەمیتری هەیە، لە دیدارێكی رۆژنامەوانیدا بۆ تۆڕی میدیای تەواردەڵێت” لەبیرمە كاتێك منداڵبووم شەرمم لە شیعرەكانم دەكرد لە دیوی پشتەوەی هەر كتێبێك دێڕێكم بە جێدەهێشت بێئەوەی ئاماژە بەناوم بكەم لە نێو دێڕیتردا وون دەبوون، سێزدە ساڵبووم كاتێك یەكەمین شیعرم بۆ پێشمەرگە نووسی، شیعر و چیرۆكی منداڵانم لە گۆڤاری گوڵەگەنم بڵاوو دەكردەوە”.
هەروەها ووتی” دوای ئەوەی تۆڕەكۆمەڵایەتیەكانی فەیسبووكم دانا تێگەیشتم كە نووسینی شیعر بۆ من واتا ئازادیەكی ڕەها، بۆ من شیعر زمانی خەیاڵە كە ئەو زمانەیە لە ناشیرینەكانی واقیع دوورم دەخاتەوە، ئەگەر بە سەختی ژیان نەوێرم خۆ دەتوانم لە ڕێگای نووسیندا تۆڵەی ئەوەی لێبكەمەوە كە ژیانێكی شیاوتر لە نێو شیعردا بدۆزمەوە، نازانم چۆن شیاوترە بەڵام ڕەنگبێ دۆزینەوەی خود و دۆزینەوەی شوێنێك باوەڕی بە گوناهی تەنهایی نییە، لەوانەیە لە وێدا گوناه جوانترین قەسیدەبێت”.
سەروین دەروێش دەربارەی شیعر دەڵێت” شیعر ئیلهامە جەستە توشی لە رزووتا دەكات لەهەمان كاتدا مرۆڤ دادەبڕێت لە هەمووشت تەنها بۆ ئەوەی نووسینەكە وەك خۆی بگەیەنێ”. هەروەها وتیشی” شیعرم بۆ سروشت نووسیوە بۆ پیاو بۆ عەشق بۆ مرۆڤدۆستی و ئاڵنگاری و ڕووبەڕووبووونەوەی نەریتی كۆن”.
خاتوو سەروین دەروێش لە یەكێك لەدەقەكانیدا دەڵێت:
خانەوادەكەم
ترسی ئەوەیان هەیە خەڵك وێنەكانم ببەن
من نازانم خەڵك وێنەیەكی ناكامڵیان بۆ چییە؟
لە كاتێكدا مەمكێكم خودا بردی و
دڵیشم ئەو!
لەلایەكیترەوە دەربارەی خەونی شاعیر و شاعیربوون سەروین دەروێش دەڵێت” من وەك ژنە شاعیرێك باجی نووسینی شیعرم داوە بەوەی لە كۆمەڵگەیەكی داخراودا پەلدەهاوێم و دەست بۆ بڤەكان دەبەم… بۆیە ئەركی شاعیر قورسە، شاعیر دەبێت نیگاركێشێكی باش بێت تابلۆی ژیانی بەوشە بكێشێت…كۆمەڵناس بێت دەربارەی فەلسەفە زانیاری هەبێت، ژنە شاعیری جواننوس هەن كە پەرەیان بە زمانی شیعر داوە، لە ڕێگەی بەكارهێنانی دەربڕین و وشەی تازە كە پێشتر نەگوتراوە”.
خاتوو سەروین لە بارەی هەژارییەوە دەنوسێت:
هەژاری كۆڵبەرێكە
سێبەری لەسەر بەفر دەتوێتەوە!
هێندێكجار دەنگێكی گەورەیە، گوێی بازاڕی دونیا كاس دەكا…
یان دەبێتە كۆڵانێكی تەنگ و
هەرجارە و پێڵاوی دڕاوی
دەستگێڕێكی لێ بەجێدەمێنێ.
خۆ ئەگەر ببێتە خوانێكی بچووكیش
دەفرەكان پڕ دەكا لە فرمێسك.
بەڵام ئەم ئێوارەیە دەستی بچووك
بچووكن لەسەر پەنجەرەی ئەو
چێشتخانانەی نانی ئێوارەیان تێدا
دەخورێت.
ژیانی ئەدەبی و كۆمەڵایەتی سەروین دەروێش.
سەروین عومەر مەولود دەروێش ناسراوە بە سەروین دەروێش، ئەم خانمە شاعیرە خاوەنی چوار منداڵە كوڕێك و سێ كچ و لەساڵی 1972 لەشاری هەولێر لە دایكبووە، شیعرەكانی لە كۆمەڵێك كتێبدا بڵاوبۆتەوە، لەوانە ،تەلاوین شیعریە من اربیل كە وەرگێڕی محمد موهەندیس وەریگێڕاوەتە سەر زمانی عەرەبی.( لە ساڵی ٢٠١٧) شیعری (شیزۆفرینیا) لە ڕۆمانی بۆرژان ی دڵزار حەسەن بڵاو بۆتەوە. لەیەكەمین فێستیڤاڵی شیعری كەركوك لە ٢٠١٦ بەشێك لە شیعرەكانی لە كتێبی شیعرەكانی ڤێستیڤاڵ بڵاوبۆتەوە ) لەیەكەمین چاپكراوی ماڵی كتێب بە بەشداری سی شاعیر كتێبی (ئەلف) بەرهەم هات و تێیدا شیعری باڕۆكەی بڵاو كردۆتەوە. حوزەیرای ٢٠١٩ كۆی بەرهەمە شیعریەكانی لەكتێبی ( بەدەم ئازارەوە سەما) چاپ كراوەو كە بڵاوكراوەكانی ماڵی كتێبە. بە دەقی ئاڵنگاری بەشداری هەشتاو یەك ژنە شاعیر لە هەر چوار پارچەی كوردستان لە كتێبی (ژن ژیان دەنوسێتەوە)كە وەزارەتی ڕۆشنبیری بە هاوكاری ماڵی كتێب لە ١/١٢/٢٠١٩ بە چاپی گەیاندووە. لە ساڵی٢٠٢١ كتێبی كڵۆم هاتە وەشان و لە ساڵی ٢٠٢٢ دەزگای هارماتان كتێبی (ئەنتۆلۆژیای شیعری ژنانی كورد بەزمانی فەرەنسی)بڵاو بۆتەوە كە دكتۆر ئەحمەد مەلا وەریگێڕاوەتە سەر زمانی فەڕەنسی ، چەندین وتار و بابەتی ئەدەبی بەسوودی لە گۆڤار و ڕۆژنامەو سایتەكان بڵاوبۆتەوە. لەگۆڤاری تەمووزی كۆمەڵەی رۆشنبیری عیراقی لە سوید، لە ژمارە ٧٠ ساڵی ٢٠١٩ بە چەند تێكستێك بەشداری كردووە كە تایبەت بوو بە شیعری كوردی ژنان.
خاتوو سەروین لە ئێستادا لێكۆڵەرەوەی تەندروستیە و خاوەنی بروانامەی دبلۆمی باڵایە لە پەیمانگای پزیشكی و جگە لەزمانی دایك زمانی عەرەبی و زمانی ئینگلیزی دەزانێت، لەچەندین چالاكی مەدەنی و خێرخوازیدا بە خۆبەخش كاری كردووە . لە شاری هەولێر گەرەكی ئازادی دەژی.
