هاژە كامەران یەكێكە لە یاریزانە بە ئەزموونەكانی یاری باسكە پاڵەوانی هەڵبژاردەی عێراق و راهێنەری بەرزكردنەوەی قورسایی هێزی لەش وەك خۆی دەڵێت ” لەیاری باسكە ئاستێكی زۆر باش و جیاوازمان هەیە وەك هەموو وڵاتە عەرەبییەكان”
هاژە كامەران كە لەساڵی 2004 وە یاری دەكات و لە ئێستادا وەك پاڵەوانێكی دیاری یاری باسكە و بەرزكردنەوەی قورسایی یاری دەكات لە لێدوانێكی تایبەتدا بۆ تۆری میدیای تەوار ووتی” ئامانجم ئەوەیە تیمێكی بەهێز دروستبكەین و وەكوو عێراق بەشداری پاڵەوانێتیەكان بكەین لە دەرەوە”
وتیشی” تا ئێستا یاریم بۆ چەند یانەیەك كردووە لەوانە ( سیروانی نوێ، نادی هەڵەبجە، ئەكاد ئەنكاوە، نادی سابیس)لە ئێستاشدا یاریزانی نادی سابیسم”
ئەم یاریزانە لە ئێستادا خاوەنی چەندین خەڵات و نازنازی وەرزشیە و بەشداری چەندین پاڵەوانێتی نێودەوڵەتی كردووە لەگەڵ هەڵبژاردەی عێراق لەوڵاتانی (میسر، دووبەی، ئەردەن، لوبنان) وە چەندین ئەنجامی باشیان بەدەستهێناوە و لە ئێستاشدا ڕاهێنەری لەشجوانیە. لەو بارەیەوە هاژە ووتی” لەگەڵ ئەو یانانەی یاریم بۆ كردوون چەندین نازناوم بەدەستهێناوە، لەوانە ساڵی 2018 وەك باشترین یاریزانی عێراق و كوردستان هەڵبژێراوم، لە ساڵی 2022 جارێكیتر وەك باشترین یاریزان دیاریكرام، لە ساڵی 2023 وەك باشترین یاریزانی عێراق هەڵبژێرام لە یاریی 3×3 لە بەغدادی پایتەخت”.
لە بەرامبەریشدا بەو پەڕی رێزەوە ووتی” زۆر سوپاسی دایك و باوك و خوشك و براكەم ئەكەم كە زۆر پاڵپشتیم ئەكەن بەهۆی ئەوانەوە سەركەوتووبووم، خۆشم زۆر هەوڵ ئەدەم تا ئاستم زیاتر و زیاتر بەرە و پێش بچێت”.
وێرای سوپاس و پێزانینی بۆ تۆڕی میدیای تەوار وتیشی” هەموو ئامانجم ئەوەیە تیمێكی بەهێز درووستبكەین و بەشداری پاڵەوانێتیەكانی دەرەوەی كوردستان و عێراق بكەین”.
هاوژین شكور: كەلار