فێرگەی كاراتی كچانی خورماڵ ماوەی ساڵێكە كراوەتەوە و ژنانی گەنجی سنوری خورماڵ ڕووی تێدەكەن و دەیانەوێت لە بواری وەرزشیدا ئاستێكی پێشكەوتوو تۆمار بكەن.
لەیەكێك لە گەڕەكە دێرینەكانی خورماڵ فێرگەی كاراتی كچانی خورماڵ هەیە، كە زیاتر لە ٥٠ كچ و منداڵی تێدایە و سەرقاڵی مەشق و ڕاهێنانن.
شێنێ زاهیر محەمەد یاریزان‌و یاریدەدەری ڕاهێنەرە لە فێرگەكە، لەبارەی كردنەوەی فێرگەكەیان دەڵێت: “پاش ئەوەی هەوڵماندا فێرگەیەكی كچان بكەینەوە، سەرجەم پێداویستییەكانمان بۆ فێرخوازان دابین كرد”.
دەربارەی مەشق و ڕاهێنانەكانیش بەتۆڕی میدیایی تەواری وت: “لەفێرگەكەماندا جگە لەڕاهێنان و مەشقی كاراتی، فێرخوازان دەبەینە شاخەوانی و مەلە و پیادەڕەویشیان پێدەكەین، تاوەكو هێزی جەستە و تەركیزیان زۆر بێت”.
شێنێ باسی لەوەشكرد كە لەماوەی كردنەوەی فێرگەكەدا ژمارەیەكی زۆر لە كچان و منداڵان ڕوویان تێكردوون كە ژمارەیان لە ٥٠ كەس زیاترە، “وا بڕیارە فێرگەیەكی تر بكەینەوە”.
وتیشی: “كچان زۆر حەزیان بە وەرزشی كاراتی هەیە و خواستی گەشتنە ئاستە باڵاكانیان هەیە، بەڵام بەهۆی نەبوونی كاتەوە نەتوانراوە وەك پێویست مەشقیان پێبكرێت”.
سەنا فەرەیدون، تەمەنی ١٤ ساڵە و دەیەوێت بچێتە هەڵبژاردەی عیراق و هیواخوازە كچانیش وەك ئەمان بتوانن بچنە فێرگەكە و ڕاهێنان بكەن و دەشڵێت: بەردەوام بن تاوەكو بگەنە لوتكە.
فێرگەی كچانی خورماڵ ماوەی ساڵێكە دامەزراوە و زیاد لە ٥٠ یاریزانی هەیە، ڕۆژانە سێ كاتژمێر و لە هەفتەیەكدا سێ ڕۆژ ڕاهێنان دەكەن و لە ئێستادا بۆ بەرزكردنەوەی توانا و ئاستەكانیان مەشق و ڕاهێنانیان چڕكردووەتەوە.
لەماوەی ئەم ساڵەدا چەندین خەڵات و بروانامەیان لە سەر ئاستی عێراق وهەرێمی كوردستان وەرگرتووە.
میهری، هەڵەبجە
