نوسینی: ساڕێژ عەزیز
وەرزشی شاخەوانی یەكێكە لەو وەرزشانە كە هۆگرانێكی زۆری هەیە و بە دەیان گرووپی شاخەوانی لە هەرێمی كوردوستان چالاكن و زۆربەی ڕۆژانی هەینی و جار و باریش لە نێوانی هەفتەدا گەشتی شاخ وكەژەكان بەڕێوە دەچێت كە ئەم گرووپانە پێكهاتەیەك لە ژنان و پیاوانی هۆگری ئەم بووارەیە. ژنان بەشێكی زۆری ئەم گرووپانەن كە ژوانیانە پێك دێنن و بە تامەزرۆیەوە لە گەشتەكاندا بەشداری دەكەن و كەسانی زۆر بە توانا و هەڵكوتوویان تیا دەبینرێت و ژمارەیەكیشیان وەك سەرپەرشتیار و ڕاهێنەر چالاكن و ئەزمونەكانیان بۆ هاوكارەكانیان دەگوازنەوە. هەر چەند ئێمە مانان لە وڵاتێكی كلاسیك و سوننەتیدا دەژین و لەمپەر گەلێك بۆ خۆ دەرخستنی ژنان لە ئارادایە. بەڵام لەم ساڵانەی دوواییدا ڕەغبەتی ژنان بۆ وەرزشی شاخەوانی گەلێك بەرچاوە و بەردەوام بە ڕێژەی بەشدار بوونی ژنان لەم گرووپانەدا زیاد دەبێت. من پێموایە لە ولاتانی جیهانی سێهەمەدا ئێستاش بەر بەستگەلێكی زۆر هەن كە حەز بە دەركەوتن و پێشكەوتنی ژنان لە هەموو بووارەكان و لەوانە وەرزشدا ناكەن و وەك جنسی دووهەم چاویان لێدەكرێت و پێیانوایە ژن هەر دەبێ لە كونجی مەتبەخدا بێت و شیو و گوڵ و مناڵ بەخێوكردن لە ئەستۆی بێت.
لە ناو بەشێكی جەماوەردا و لە ناو كۆمەڵگەی ئێمەشدا باوك و برا و خاڵ و مام، ئێستاش قسەی ئەوەڵ دەكەن و بڕیار بڕیاری ئەوانە و ژن بۆی نیە لە سەر قسەیان قسە بكات. بێگومان بەم بۆنەیەوە ژمارەیەكی زۆر لە ژنان و كچانی ئەم وڵاتە كە حەز و خولیای وەرزش و شاخەوانیان هەیە، لێی مەحرووم دەكرێن و مەجالی بەشداربوونیان لێئەستێنرێتەوە. بێجگە لەم كۆسپەگەلە، دووگیانی و مناڵداربوونی ژنان یەكێكە لەو هۆكارانەی كە بەشێك لە ژنان لە وەرزشی شاخەوانی بێبەش دەبن و خولیا و حەزیان دەخنكێندرێت. زۆرن ئەو ژنانەی كە بە هۆی زەختی بنەماڵە، سوننەتی كۆمەڵگە و یا هەبوونی مناڵ، لە دەركەوتن و پێشكەوتن دادەبڕێن و توانا و ئیستیعدادەكانیان وردە وردە دەپووكێتەوە و هیچ كات نە خۆیان و نە كۆمەڵگە كەڵكیان لێوەرناگرن.
سەرەڕای هەموو ئەو بەربەستانە، هەر چەند ئەم باوەڕە كۆنە لە گۆشە و كەناری ئەم وڵاتە دەبینرێت، بەڵام ژنان بە هەوڵ و هیممەتی خۆیان و سەلماندنی خۆیان، پاشەكشەیەكی بەرچاویان بەم باوەڕە دواكەوتوانە داوە و ڕۆژانە بە ڕێژەی دەركەوتنیان لە هەموو بووارەكانی ژیان، لەوانەش وەرزش و شاخەوانی زیاتر و زیاتر دەبێت. هەر بۆیە ئێستا ژنان لەو گەشتانەدا بەشداردەبن كە شەو مانەوە لە زستان و لە ژێر بەفر باران دەكەن و لە گەشتی دەرەوەی وڵات و شاخە سەختەكانی وەك ، دەماوەند و سەبەلان لە ئێران و ئاگری و هەڵگورد دەكەن و وەك پیاوان و بێ جیاوازی بەشداردەبن. شاخەوانی یەكێكە لەو وەرزشانەی كە سوودێكی زۆری بە تایبەت بۆ ژنان لە بوواری دەرونی و جەستەییەوە هەیە و پێویستە دەسەڵات و لایەنە پێوەندیدارەكان و ڕاگەیاندنەكان ئەم خاڵە لە بەر چاو بگرن و بانگەشە و ڕیكلامی بەسوودی وەرزشی شاخەوانی لە بیر نەكەن و وەك ئەركێك لە كار و ئەركی خۆیان بەجێی بهێنن.